Rossiya Ozarbayjondan pomidor va olma olib kirishga taqiq qo‘ydi

“Rosselxoznadzor” 10-dekabrdan Ozarbayjonda yetishtirilgan pomidor va olmalarni Rossiyaga olib kirilishini taqiqlaydi. Bunga ushbu mahsulotlarda zararkunandalar topilgani sabab bo‘lmoqda, deb xabar beradi “RBK”.

Ta’kidlanishicha, Ozarbayjon Oziq-ovqat xavfsizligi agentligiga ushbu mahsulotlarda karantin obyektlari muntazam aniqlangani to‘g‘risida xabar berib kelingan.

“Faqatgina 2020-yilning 22-oktabridan hozirga qadar meva-sabzavotlar (pomidor, olma) tarkibida Yevrosiyo iqtisodiy ittifoqi karantin obyektlarining yagona ro‘yxatiga kiritilgan — Janubiy Amerika pomidor kuyasi va sharqiy kuya bo‘yicha 17 ta holat qayd etilgan”, — deyiladi xabarda.

Ozarbayjon — Rossiyaga yangi va muzlatilgan pomidorlarni katta miqdorda yetakazib beruvchi davlat hisoblanadi. 2019-yilning o‘zida mamlakat Rossiyaga 189,1 million dollarlik 172,3 ming tonna pomidor olib kirgan. Ikkinchi eng yirik importyor esa Turkiya — 113,6 million dollarlik 93,9 ming tonna pomidor. Ro‘yxatning uchinchi pog‘onasidan 69,4 ming tonna bilan (84,1 million dollar) Xitoy o‘rin olgan.

Shuningdek, 2019-yilda Ozarbayjon Rossiyaga eng ko‘p olma yetkazib bergan davlatlar uchligidan o‘rin olgan, joriy yilda — beshinchi o‘rinda.

Avvalroq Rossiya tomoni Farg‘ona viloyatida yetishtirilgan pomidor va bulg‘or qalampirining olib kirilishiga vaqtinchalik cheklov joriy etgan edi. “Rosselxoznadzor”ning aniqlik kiritishicha, bunga mahsulotlarda ToBRFV (tomato brown rugose fruit virus) virusi topilgani sabab bo‘lgan. Keyinroq O‘zbekistondan Rossiyaga eksport qilingan quritilgan mevalarda zararli organizm aniqlangani ham ma’lum bo‘lgandi.