Pepedan Ibragimovichgacha. Lionel Messi bilan chiqisha olmagan dunyo futboli yulduzlari

Lionel Messi, shubhasiz, futbol olamining eng mashhur ikki vakilidan biri hisoblanadi. Tabiiyki, u ko‘p sonli muxlislarga ham ega. Biroq Messidek daholar ham ba’zida insonlar bilan munosabat o‘rnatishda muammolarga duch keladi. Quyida aynan Leo bilan murosa qila olmagan futbolchilar haqida hikoya qilamiz.

Royston Drente

Ehtimol, ko‘pchilik Drenteni eslolmas, biroq uning ushbu ro‘yxatdan joy olishiga arzirli sabab bor. U bir vaqtlar yulduzli “Real” sharafini himoya qilardi. Aksariyat muxlislar kamtar va o‘zini tutib tura oladigan Messining kimnidir kamsitishi, hatto uning irqi haqida keskin gapirishini taxmin ham qilmasa kerak. Biroq Drente “Real”dagi uch yillik faoliyatidan keyin intervyularidan birida Messi uni maydonda bir necha bor irqi uchun kamsitgani haqida gapiradi. Roystonga Messidan bu gapni eshitish juda qattiq ta’sir qiladi va garchi oradan o‘n yillar o‘tgan bo‘lsa-da, u buni hamon kechira olmaydi.

Alvaro Arbeloa

Messining aksariyat janjallari “Real” futbolchilari bilan kechgan. Uning navbatdagi “madridchi” dushmani Arbeloa bo‘lgan. Ular uzoq yillar davomida bir-biriga qarshi o‘ynagan va juda ko‘p marotaba to‘qnash kelgan. Kelishmovchilikning eng yuqori cho‘qqisi esa 2013-yilda Ispaniya Kubogi yarim finalidan o‘rin olgan o‘yidan keyin ro‘y bergan va bu haqida barcha ispan nashrlari bong urgan. O‘yindan so‘ng avtoturargohda Messi va Alvaro o‘rtasida kichik to‘qnashuv boshlanib ketadi. Guvohlarning so‘zlariga ko‘ra, Arbeloa rafiqasi bilan birga ketayotgan vaqtda Leo mojaroni boshlaydi va uni haqorat qiladi.

Pepe

Hujumchilar “kushandasi” nomini olgan Pepe ko‘plab forvardlar bilan chiqa olmasligi bor gap. Shu jumladan, Messi ham portugaliyalik bilan ko‘p marotaba to‘qnash kelgan. Ular o‘rtasidagi eng katta mojaro Ispaniya Kubogining 1/4 final o‘yinida sodir bo‘lgan. Pepe va Messi o‘rtasida kechgan suhbat kameralar nigohiga tushib qoladi. Pepe argentinalik futbolchiga yaqinlashadi va qo‘pollik bilan: “Sen menga qarshi o‘ynashdan qo‘rqasan”, —deydi. Leo esa o‘z navbatida unga shunday javob qaytaradi: “Real” darvozasini ishg‘ol qilayotganim aks etgan suratlarning barchasida sen ham borsan”. Bu Pepening jahlini chiqaradi va bir necha daqiqadan so‘ng u maydonda yotgan argentinalikning qo‘lini ataylab bosib o‘tadi.

Ushbu vaziyat OAV va muxlislar o‘rtasida haqiqiy shov-shuvni keltirib chiqardi, ahvol shu darajaga yetadiki, hatto “Real” rahbariyati Pepeni kechirim so‘rashga majbur qiladi. Aftidan, mojaro bartaraf etilgandek tuyuladi, ammo deyarli hech kim Pepening kechirim so‘rashi samimiy bo‘lganiga ishonmaydi. Futbol olamidagi barchaga ma’lumki, ular hali ham bir-birlarini yomon ko‘radi.

Mauro Ikardi

Bu, ehtimol, futbolchilar o‘rtasidagi o‘zaro nafratning eng mashhur holatlaridan biri bo‘lsa kerak. Ko‘pchilik nima bo‘lganini va bularning barchasi nimaga olib kelganini biladi. Shunday bo‘lsa-da, qisqacha izoh berib o‘tishni lozim topdik. Ikardi 2014-yilda Maksi Lopes ismli futbolchidan rafiqasi Vanda Narani tortib oladi. Messi esa Maksining qadrdon do‘sti edi. Bu o‘z navbatida Leoning Ikardiga nisbatan nafratiga sabab bo‘ladi. Leoning Argentina terma jamoasi uchun qanchalik muhimligi barchaga ma’lum, u bir o‘zi murabbiylarni almashtirishi va hatto jamoaga kimning chaqirilishini ham hal qilishi mumkin. Ushbu voqeadan so‘ng Mauro so‘nggi bir necha yillar davomida A Seriyaning eng yaxshi hujumchisi bo‘lganiga qaramay, umuman milliy jamoaga chaqirilmagan. Bugungi kunda ham futbolchilar bir-birlarini ochiqchasiga yoqtirmaydi.

Zlatan Ibragimovich

Va nihoyat Zlatan Ibragimovich. U bir vaqtning o‘zida Messiga qanchalik qoyil qolsa, uni xuddi shu darajada yomon ham ko‘radi. Gap shundaki, aynan Leo tufayli Zlatan “Barselona”da o‘z o‘rniga ega bo‘la olmagan. Bu borada Ibragimovichning o‘zi shunday deydi: “Gvardiola — ajoyib murabbiy, ammo u qo‘rqoq. “Barselona”da u Messi uchun meni qurbon qilgan, bu haqida menga aytishga esa uning jur’ati yetmagan. Jamoada hamma narsa Messi uchun edi”.

Darhaqiqat, Leo qisman bo‘lsa-da, Ibraning faoliyatiga ta’sir o‘tkazgan. Bunday deyishga sabab, Zlatan agar “Barsa”da qolganida qator sovrinlarni qo‘lga kiritishi mumkin edi. Biroq shunga qaramay, Ibragimovich Messi singari dunyo futbolining eng yorqin namoyondalaridan biri bo‘lib qolaveradi.