Пепедан Ибрагимовичгача. Лионель Месси билан чиқиша олмаган дунё футболи юлдузлари

Лионель Месси, шубҳасиз, футбол оламининг энг машҳур икки вакилидан бири ҳисобланади. Табиийки, у кўп сонли мухлисларга ҳам эга. Бироқ Мессидек даҳолар ҳам баъзида инсонлар билан муносабат ўрнатишда муаммоларга дуч келади. Қуйида айнан Лео билан муроса қила олмаган футболчилар ҳақида ҳикоя қиламиз.

Ройстон Дренте

Эҳтимол, кўпчилик Дрентени эслолмас, бироқ унинг ушбу рўйхатдан жой олишига арзирли сабаб бор. У бир вақтлар юлдузли «Реал» шарафини ҳимоя қиларди. Аксарият мухлислар камтар ва ўзини тутиб тура оладиган Мессининг кимнидир камситиши, ҳатто унинг ирқи ҳақида кескин гапиришини тахмин ҳам қилмаса керак. Бироқ Дренте «Реал»даги уч йиллик фаолиятидан кейин интервьюларидан бирида Месси уни майдонда бир неча бор ирқи учун камситгани ҳақида гапиради. Ройстонга Мессидан бу гапни эшитиш жуда қаттиқ таъсир қилади ва гарчи орадан ўн йиллар ўтган бўлса-да, у буни ҳамон кечира олмайди.

Альваро Арбелоа

Мессининг аксарият жанжаллари «Реал» футболчилари билан кечган. Унинг навбатдаги «мадридчи» душмани Арбелоа бўлган. Улар узоқ йиллар давомида бир-бирига қарши ўйнаган ва жуда кўп маротаба тўқнаш келган. Келишмовчиликнинг энг юқори чўққиси эса 2013 йилда Испания Кубоги ярим финалидан ўрин олган ўйидан кейин рўй берган ва бу ҳақида барча испан нашрлари бонг урган. Ўйиндан сўнг автотураргоҳда Месси ва Альваро ўртасида кичик тўқнашув бошланиб кетади. Гувоҳларнинг сўзларига кўра, Арбелоа рафиқаси билан бирга кетаётган вақтда Лео можарони бошлайди ва уни ҳақорат қилади.

Пепе

Ҳужумчилар «кушандаси» номини олган Пепе кўплаб форвардлар билан чиқа олмаслиги бор гап. Шу жумладан, Месси ҳам португалиялик билан кўп маротаба тўқнаш келган. Улар ўртасидаги энг катта можаро Испания Кубогининг 1/4 финал ўйинида содир бўлган. Пепе ва Месси ўртасида кечган суҳбат камералар нигоҳига тушиб қолади. Пепе аргентиналик футболчига яқинлашади ва қўполлик билан: «Сен менга қарши ўйнашдан қўрқасан», —дейди. Лео эса ўз навбатида унга шундай жавоб қайтаради: «Реал» дарвозасини ишғол қилаётганим акс этган суратларнинг барчасида сен ҳам борсан». Бу Пепенинг жаҳлини чиқаради ва бир неча дақиқадан сўнг у майдонда ётган аргентиналикнинг қўлини атайлаб босиб ўтади.

Ушбу вазият ОАВ ва мухлислар ўртасида ҳақиқий шов-шувни келтириб чиқарди, аҳвол шу даражага етадики, ҳатто «Реал» раҳбарияти Пепени кечирим сўрашга мажбур қилади. Афтидан, можаро бартараф этилгандек туюлади, аммо деярли ҳеч ким Пепенинг кечирим сўраши самимий бўлганига ишонмайди. Футбол оламидаги барчага маълумки, улар ҳали ҳам бир-бирларини ёмон кўради.

Мауро Икарди

Бу, эҳтимол, футболчилар ўртасидаги ўзаро нафратнинг энг машҳур ҳолатларидан бири бўлса керак. Кўпчилик нима бўлганини ва буларнинг барчаси нимага олиб келганини билади. Шундай бўлса-да, қисқача изоҳ бериб ўтишни лозим топдик. Икарди 2014 йилда Макси Лопес исмли футболчидан рафиқаси Ванда Нарани тортиб олади. Месси эса Максининг қадрдон дўсти эди. Бу ўз навбатида Леонинг Икардига нисбатан нафратига сабаб бўлади. Леонинг Аргентина терма жамоаси учун қанчалик муҳимлиги барчага маълум, у бир ўзи мураббийларни алмаштириши ва ҳатто жамоага кимнинг чақирилишини ҳам ҳал қилиши мумкин. Ушбу воқеадан сўнг Мауро сўнгги бир неча йиллар давомида А Сериянинг энг яхши ҳужумчиси бўлганига қарамай, умуман миллий жамоага чақирилмаган. Бугунги кунда ҳам футболчилар бир-бирларини очиқчасига ёқтирмайди.

Златан Ибрагимович

Ва ниҳоят Златан Ибрагимович. У бир вақтнинг ўзида Мессига қанчалик қойил қолса, уни худди шу даражада ёмон ҳам кўради. Гап шундаки, айнан Лео туфайли Златан «Барселона»да ўз ўрнига эга бўла олмаган. Бу борада Ибрагимовичнинг ўзи шундай дейди: «Гвардиола — ажойиб мураббий, аммо у қўрқоқ. «Барселона»да у Месси учун мени қурбон қилган, бу ҳақида менга айтишга эса унинг журъати етмаган. Жамоада ҳамма нарса Месси учун эди».

Дарҳақиқат, Лео қисман бўлса-да, Ибранинг фаолиятига таъсир ўтказган. Бундай дейишга сабаб, Златан агар «Барса»да қолганида қатор совринларни қўлга киритиши мумкин эди. Бироқ шунга қарамай, Ибрагимович Месси сингари дунё футболининг энг ёрқин намоёндаларидан бири бўлиб қолаверади.