Rossiya Federal xavfsizlik xizmati Volgograd shahrida Suriyadagi terrorchilar ko‘rsatmasi asosida terakt rejalashtirgan ikki nafar jangarini yo‘q qilgani to‘g‘risida xabar berilgandi. “RIA Novosti”ining Rossiya Tergov qo‘mitasiga tayanib yozishicha, jangarilar o‘zbekistonlik bo‘lib, hozirda holat yuzasidan jinoyat ishi qo‘zg‘atilgan.

Foto: Rossiya Federal xavfsizlik xizmati

Terrorchilik faoliyatini muvofiqlashtirish Suriyadan amalga oshirilgan. Maxsus xizmatlar xabariga ko‘ra, jangarilar “Tavhid va jihod katibasi” xalqaro terrorchilik tashkilotining a’zolari bo‘lib, hokimiyat organlari binolariga, harbiy xizmatchilarning yashash joylariga hamda portlash va yong‘in xavfi bo‘lgan korxonalarga hujum uyushtirishni rejalashtirgan.

“Huquq-tartibot organlari xodimlarining hayotiga tajovuz qilishga urinish fakti bo‘yicha jinoyat ishi qo‘zg‘atildi”, — deyiladi xabarda.

Tergov qo‘mitasining ma’lum qilinishicha, hujrada porlovchi qurilmalarga ega 23 va 27 yoshli O‘zbekiston fuqarolari taslim bo‘lish borasidagi talablarni bajarmasdan o‘t ochgan va yo‘q qilingan.

Jangarilarning yashash joyida o‘qotar qurollar, o‘q-dorilar, kimyoviy va zararlovchi moddalar hamda qo‘lbola portlovchi vositalar, diniy xarakterdagi adabiyotlar, shuningdek, Volgogradning terakt rejalashtirilgan joylari belgilangan xaritasi topilgan.