O‘tgan hafta “Akvamen” yulduzi Jeyson Momoa o‘zini haqiqiy qahramonlardek tutdi. Aktyor kam uchraydigan miya saratonidan aziyat chekuvchi Denni Shien ismli yosh muxlisi bilan videoaloqa orqali bog‘langan, deb xabar beradi “Film.ru”.

Foto: “Film.ru”

Bunga qadar Shien ishtirokidagi video internetda virus kabi tarqalgan edi. Unda bolakay sovg‘a qutisini ochib, ichidan “Akvamen” o‘yinchog‘ini topib oladi va xursandligidan “Ey, Xudo, u mening sevimli qahramonim — Akvamen!” deya baqiradi.

Rolikdan xabar topgan Momoa FaceTime orqali Shien bilan bog‘lanishga qaror qilgan. Aktyor bolakay bilan delfinlarni yaxshi ko‘rishi haqida gaplashgan. U hech qachon tirik delfinlarni ko‘rmaganini aytgach, Momoa buni hal etishga va’da bergan. Shuningdek, Denni Momoaga o‘zining “Akvamen” o‘yinchog‘ini ko‘rsatgan, aktyor esa keyingi missiyasi Shienga qahramonning haqiqiy uch shoxli nayzasini sovg‘a qilish bo‘lishini ma’lum qilgan.

Jeyson Momoa ushbu suhbat videosini o‘zining Instagram’dagi sahifasiga joylashtirgan. Aktyorning folloverlari ushbu holatdan ta’sirlanib, unga maqtovlar yog‘dirgan.

Avvalroq Kianu Rivz bilan 15 daqiqalik uchrashuv auksionda sotilayotgani to‘g‘risida xabar berilgandi. Aktyor uchrashuvdan tushgan pullarni saratonga chalingan bolalar va ularning oilalariga topshiradi.