O‘zbekistonda endi ish haqi va ish stajini tasdiqlash to‘g‘risidagi arxiv ma’lumotnomasini onlayn olish mumkin

Endilikda ish haqi va ish stajini tasdiqlash to‘g‘risidagi arxiv ma’lumotnomasini olish yana-da qulay va ortiqcha ovoragarchiliksiz amalga oshiriladi, deb xabar bermoqda Yagona interaktiv davlat xizmatlari portali.

Qayd etilishicha, buning uchun dastlab Yagona portalda ro‘yxatdan o‘tish, “Ma’lumotnomalar” bo‘limidan “Ish haqi va ish stajini tasdiqlash to‘g‘risidagi arxiv ma’lumotnomasini olish” xizmatini topish va mehnat faoliyatini yuritgan davr haqidagi ma’lumotlar asosida so‘rovnomani to‘ldirib, yuborish tugmasini bosish kerak.

Mazkur davlat xizmatidan foydalanish bepul, shuningdek, elektron raqamli imzo ham talab etilmaydi.

So‘rovnoma kelib tushgan vaqtdan boshlab ish stajini tasdiqlashga oid ma’lumotnomalar uchun — 5 ish kuni, ish haqini tasdiqlashga oid ma’lumotnomalar uchun — 20 ish kunidan oshmagan muddatda tegishli QR-kodli ma’lumotnoma shakllantiriladi hamda YaIDXP orqali elektron shaklda yuboriladi.

Avvalroq O‘zbekistonda doimiy yashash joyida ro‘yxatdan o‘tganlar soni to‘g‘risida ma’lumotnomani onlayn olish va “propiska”ni onlayn rasmiylashtirish imkoni yaratilgandi