AQShda amaliy tashrif bilan bo‘lib turgan O‘zbekiston tashqi ishlar vaziri Abdulaziz Komilov 19-noyabr kuni o‘zbekistonlik Saidahmad Arslanovga “Shuhrat” medali va elchixonaning birinchi kotibi Faxriddin Mo‘minovga “Mehr-saxovat” ko‘krak nishonini tantanali ravishda topshirdi. Bu haqda O‘zbekistonning Vashingtondagi elchixonasiga tayanib, “Xalq so‘zi Online” xabar berdi.
O‘zbekiston Prezidenti Shavkat Mirziyoyevning 2020-yil 27-avgustdagi farmoniga binoan Saidahmad Arslanov mamlakat mustaqilligini mustahkamlash, uning iqtisodiy salohiyatini oshirish, yosh avlodni vatanga muhabbat ruhida tarbiyalashga qo‘shgan munosib hissasi, mustaqillik g‘oyalariga sadoqati, fidokorona mehnati, vatanparvarligi, jamoat hayotida faol ishtirok etish orqali qo‘lga kiritilgan sharaf va hurmat uchun “Shuhrat” medali bilan taqdirlangan edi.
Axborot texnologiyalariga ixtisoslashgan ASO Systems kompaniyasi prezidenti Saidahmad Arslanov 18 yildan ortiq vaqt davomida AQShda yashab keladi. U ikki tomonlama siyosiy, iqtisodiy va madaniy aloqalarni mustahkamlashda hamda turli xayriya tadbirlarini o‘tkazishda O‘zbekiston diplomatik vakolatxonalari bilan doimiy ravishda hamkorlik qilib kelmoqda.
Xususan, u 2019-yil 22-dekabr kuni o‘tkazilgan O‘zbekiston Oliy Majlisi Qonunchilik palatasi sayloviga AQShda tayyorgarlik ko‘rish va uni o‘tkazishda faol ishtirok etdi. Shuningdek, 2020-yil aprel oyida O‘zbekistonning AQShdagi elchixonasi va Bosh konsulxonasi hamda Amerika qit’asi mamlakatlaridagi diaspora tashkilotlari hamkorligida tashkil etilgan “Biz O‘zbekistonga befarq emasmiz” xayriya aksiyasining bosh koordinatori bo‘ldi.
Pandemiya davrida AQSh va Kanadadagi vatandoshlar 100 ming dollardan ko‘proq pul yig‘di. S.Arslanov va boshqa vatandoshlarning faol yordami bilan ushbu mablag‘lar evaziga Qashqadaryo va Surxondaryo viloyatlarida koronavirusga chalingan bemorlarni davolash uchun 350 ta kislorod konsentrati va 200 ta pulsoksimetr sotib olindi.
Shuningdek, u AQShda O‘zbekistondagi ko‘makka muhtoj fuqarolarga yordam berish uchun tashkil etilgan Give to Get International Inc xayriya fondining faol a’zolaridan biri hisoblanadi.
Hozir Saidahmad Arslanov O‘zbekiston innovatsion rivojlanish vazirligi, shuningdek, IT Park bilan hamkorlikda respublikamizda axborot texnologiyalari sohasida AQShda tan olinadigan sertifikatlar berishni joriy etish loyihasi ustida ishlamoqda.
S.Arslanov Prezident Shavkat Mirziyoyevga yuksak mukofot uchun minnatdorlik bildirib, O‘zbekistonning Vashingtondagi elchixonasi, Nyu-Yorkdagi Bosh konsulxonasi, AQSh va Kanadadagi o‘zbek diaspora tashkilotlari tomonidan o‘tkazilgan “Biz O‘zbekistonga befarq emasmiz” xayriya aksiyasini ushbu mamlakatlardagi vatandoshlarimizni jipslashtirganini ta’kidladi.
Mavzuga doir: Abdulaziz Komilov diniy erkinliklarni ilgari surish bo‘yicha vazirlar konferensiyasida ishtirok etdi
O‘zbekiston xalqi va Prezidenti mening timsolimda o‘zbek xalqining taqdiri va sog‘lig‘iga befarq bo‘lmagan AQSh va Kanadadagi vatandoshlarimiz hamda do‘stlarimizning kamtarona hissasini yuqori baholadi. Shu munosabat bilan davlatimiz rahbari va O‘zbekiston xalqiga AQSh va Kanadadagi barcha vatandoshlarimiz va do‘stlarimiz nomidan meni “Shuhrat” medali bilan taqdirlagani uchun minnatdorlik bildiraman”, – dedi Saidahmad Arslanov.
Avvalroq Abdulaziz Komilov Pentagon rahbari vazifasini bajaruvchi Kristofer Miller bilan uchrashgani haqida xabar berilgandi.
Izoh (0)