Microsoft kompaniyasi asoschisi, milliarder Bill Geyts pandemiya sabab biznes yuritish va ishga munosabat keskin o‘zgarib ketadi deb hisoblamoqda, deya yozgan CNBC.

Foto: El Confidencial

Milliarderning fikricha, koronavirus ustidan g‘alabaga erishgan kompaniyalarning aksariyat xodimlari masofadan turib ishlashda davom etadi, xizmat safarlarining soni ham 50 foizga qisqaradi, shuningdek, ishchi uchrashuvlar “oltin standart” bo‘lmay qoladi.

“Menimcha, xizmat safarlarining 50 foizi va ofisdagi ish kunlarining 30 foizi yo‘q bo‘lib ketadi”, — degan Bill Geyts Dealbook konferensiyasi vaqtida New York Times’ga bergan intervyusida.

Bundan tashqari, uydan turib ishlash ayrim kompaniyalar uchun doimiy faoliyatga aylanib ketishi mumkin.

“Ayrim kompaniyalar masofadan turib ishlashga radikal munosabatda bo‘ladi” — degan Geyts Twitter’ning o‘z xodimlariga doimiy ravishda uydan turib ishlashga ruxsat berganiga shama qilib.

Microsoft asoschisi videokonferensaloqa orqali o‘tkaziladigan uchrashuvlarning bevosita o‘tadigan tadbirlardan farqli tomoni ularda boshqa kishilar bilan yaqinroq tanishish imkoni yo‘qligida ekanini qayd etdi.

Ko‘plab texnologik kompaniyalar pandemiya boshlanganidan keyin ish faoliyatini qayta ko‘rib chiqqan. Twitter — xodimlarini masofadan ishlashga o‘tkazgan va ularning ofisga qaytmasdan ishlashi mumkinligini bildirgan yagona kompaniya emas. Facebook ham o‘z xodimlarining uydan ishlashiga ruxsat bergan, ammo ayrim holatlarda ularning maoshi qisqartiriladi.

Avval Bill Geytsning eng yaxshi xodimlarni yollash va kompaniyada saqlab turish lozimligi haqida maslahat bergandi.