Ozarbayjon prezidenti Tog‘li Qorabog‘dagi mojaro tugaganini ma’lum qildi

Ozarbayjon prezidenti Ilhom Aliyev Tog‘li Qorabog‘dagi mojaro tugaganini aytdi. “Urush maydonida sharafli g‘alabani qo‘lga kiritgan Ozarbayjon siyosiy maydonda ham o‘z maqsadiga erisha oldi”, — dedi prezident Agdam shahri va Agdam tumanining armiya tomonidan egallanishi bilan bog‘liq bo‘lgan xalqqa murojaatida. Bu haqda “RBK” xabar berdi.

Aliyevning ta’kidlashicha, Armaniston “okkupatsiya abadiy bo‘ladi” degan umidda istehkomlar qurgan. “Ular yangi xaritalarni tuzdi, ularga ko‘ra ayirmachi Tog‘li Qorabog‘ nafaqat sobiq Tog‘li Qorabog‘ avtonom viloyatini, balki boshqa barcha bosib olingan yerlarni qamrab olgandi. Bu xaritalar endi qayerga ketdi? Ular g‘oyib bo‘ldi, bu xaritalar endi yo‘q”, — dedi Ozarbayjon prezidenti.

Prezidentning so‘zlariga ko‘ra, Armaniston armiyasi endi yo‘q. “Biz uni yakson qildik, mag‘lub etdik, yo‘q qildik. Agdam viloyati bizga birorta o‘qsiz qaytadi”. — dedi davlat rahbari.

Ozarbayjon prezidenti, shuningdek, Agdam va Shushani Stepanakertdan o‘tadigan yo‘l bog‘lashini aytdi. Uning so‘zlariga ko‘ra, bu barcha kommunikatsiyalarning ochilishini nazarda tutadigan 10-noyabrdagi uch tomonlama kelishuvda nazarda tutilgan.

Ilhom Aliyev, Armaniston bosh vaziri Nikol Pashinyan va Rossiya prezidenti Vladimir Putin o‘rtasida 10-noyabrda imzolangan kelishuvga muvofiq, Ozarbayjon harbiy harakatlar paytida bosib olingan hududni ham, 1990-yillarning boshlarida qo‘ldan chiqarilgan Lachin, Agdam va Kelbajar tumanlaridagi aholi punktlarini ham oladi.

Armaniston Qurolli kuchlari o‘z pozitsiyalaridan olib chiqilmoqda, mintaqaga 2 mingga yaqin rus tinchlikparvari texnika bilan olib kelinmoqda. Armanistonga Qorabog‘ga transport yo‘lagi yaratilishi kafolatlanadi, shu bilan bir vaqtda Ozarbayjondan Naxichevan eksklavigacha transport yo‘lagi yaratiladi.