Amerika OAVlari tomonidan saylovlar g‘olibi deb e’lon qilinayotgan AQSh prezidentligiga nomzod Jo Bayden uni saylangan prezident deb tan olmayotgan Donald Tramp ma’muriyatiga qarshi sud da’vosi berilishini istisno qilmadi. Bu haqda Bayden Delaver shtatidagi matbuot anjumanida ma’lum qildi, deb yozadi “RBK”.
Jurnalistlar demokratdan Tramp ma’muriyati va Umumiy xizmatlar boshqarmasi (GSA, hokimiyatning yangi prezidentga rasmiy tarzda topshirilishiga ruxsat berishi kerak) ustidan sudga da’vo berilishi ehtimoli haqida so‘radi. “Biz buni istisno qilmaymiz”, — dedi Bayden. Shu bilan birga, u sudlashish ko‘p vaqt olishini, shu sababli uning jamoasi respublikachi kongressmen va senatorlar bilan, shuningdek, shtatlar gubernatorlari bilan hamkorlikka umid qilayotganini ta’kidladi.
Bundan tashqari, demokrat Trampning saylovlardagi mag‘lubiyatini tan olishdan bosh tortishi mas’uliyatsizlik hisoblanishini aytdi. “Bundan maqsad nimaligini bilmayman, lekin bu mutlaqo mas’uliyatsizlik”, — dedi Bayden.
Avvalroq Bayden amaldagi AQSh prezidenti Donald Tramp vakolatlarni topshirishdan bosh tortsa, yanada ko‘proq o‘limlar kelib chiqishi haqida aytgan edi. Uning so‘zlariga ko‘ra, agar hokimiyat topshirilishini 20-yanvargacha kutadigan bo‘lsa, AQSh yana bir yarim oy yo‘qotadi. “Koordinatsiya hozir yoki iloji boricha tezroq bo‘lishi muhimdir”, — dedi Bayden.
Shundan keyin demokrat kongressmenlar Adam Shiff va Erik Suoluell AQSh umumiy xizmatlar boshqarmasi rahbari Emili Myorfini Baydenning g‘alabasini tan olishni kechiktirish orqali odamlarning hayotini xavf ostiga qo‘yishda aybladi. “Agar idora Baydenning g‘alabasini tan olsa, hokimiyatni topshirish jarayoni boshlanadi. Bu Baydenning koronavirus pandemiyasiga qarshi kurashga tayyorlanishi uchun zarurdir”, — dedi Suoluell.
Keyinroq AQSh Sog‘liqni saqlash va ijtimoiy xizmatlar vazirligi AQSh umumiy xizmatlar boshqarmasi demokratlardan nomzod Jo Baydenning prezident saylovlaridagi g‘alabasi haqida rasman ma’lum qilmagunicha uning jamoasi bilan ishlashdan bosh tortdi. “AQSh umumiy xizmatlar boshqarmasi qaror qabul qilganidan keyin vakolatlarning to‘liq, birgalikda va professional tarzda topshirilishini ta’minlashimizni aniq-ravshan aytdik. Biz yo‘riqnomaga amal qilamiz”, — dedi vazirlik rahbari Aleks Azar.
AQShda prezidentlik saylovi 2020-yilning 3-noyabr kuni bo‘lib o‘tdi, ovozlar bir necha kun davomida hisoblab chiqildi, 7-noyabr kuni AQShning yirik OAVlari saylovda Bayden g‘alaba qozonganini ma’lum qildi. Donald Tramp esa mag‘lubiyatni tan olmadi. U saylovlar qonunbuzarliklar bilan o‘tgan degan fikrda, shuningdek, saylovlarda mamlakat konstitutsiyasi buzilganini aytgan.
Izoh (0)