Senatning Fan, ta’lim va sog‘liqni saqlash masalalari qo‘mitasi raisi Odiljon Iminov O‘zbekiston ta’lim tizimi haqida o‘z fikr-mulohazalarini bildirdi. U yillar davomida ta’limga bo‘lgan e’tibor va endilikda ko‘rinayotgan natijalarni hududida 40 yildan beri urush tinmayotgan Afg‘onistonniki bilan o‘zaro qiyosladi, deya xabar qilgan “Kun.uz”.
Iminov O‘zbekistonda ta’lim-tarbiya, millatning tarbiyasi masalasidagi ayrim jihatlar ma’lum bir nuqtaga (so‘nggi nuqta nazarda tutilgan) yetib kelganini qayd etgan.
“Ta’limda ko‘p narsani ko‘rib ko‘rmaganga, bilib bilmaganga olib yurganimiz bilan qanaqa avlod shakllanganini rahbariyat ham biladi, buni ular qayta-qayta ta’kidlayapti.
Shunday avlod shakllanib qolgan. Men hali reproduktiv salomatlik, jinsiy tarbiya borasidagi bilimlarga to‘xtalmayapman.
Ta’lim-tarbiya, o‘quv muassasalaridagi moddiy texnik baza... Biz ko‘pincha Afg‘onistonni misol qilib keltiramiz. Ha, Afg‘onistonda 40 yildan beri urush, u yerdan butun boshli avlodlar chiqib ketdi, tinchlikda yashamagan, ta’lim olmagan yoki tarbiyani olmagan avlod bo‘ldi, deymiz. Lekin yillar davomida o‘zimiz ham zamonaviy bilim berish tizimidan uzilib qoldik-ku. Biz zo‘r dedik-da, hamma imkoniyatni oliy ta’limga tashladik. Oliy ta’lim, oliy ta’lim dedik, lekin shu oliy ta’lim emasmi korrupsiya maydoniga aylangan”, – degan qo‘mita raisi 19-noyabr kuni bo‘lgan qo‘mita yig‘ilishida.
Mavzuga doir: O‘zbekistonda 9 oyda korrupsiyaga oid jinoyatlar sodir etgan mansabdor shaxslar haqidagi ma’lumot ochiqlandi
“Maktabgacha ta’limda faqat elita qatlam bolasi tarbiyalandi. Odamlarda ham maktabgacha ta’limda elitaning bolasi o‘qiydi, degan fikr shakllandi. Maktabgacha ta’lim muassasalarining ommaviyligi yo‘qoldi. Ommaviylik yo‘qolgandan keyin, kuchlilar chiqmay qo‘ydi. Axir saralanganning ichidan ham bitta, ikkita kuchli chiqadi xolos.
Odamlarning ichida, millatning ichida bilim, saviya bo‘lsa, keyin undan millat ko‘tarilib chiqadi-da. Ta’lim va sog‘liqni saqlashdagi mana shu masalalarni pandemiya shundayligicha ko‘rsatib berdi. U biz qaysi holatda ekanligimizni ochib berdi. Mana, endi tibbiyotga ham e’tibor qaratilyapti, endi buni susaytirmaslik kerak”, – deya ta’kidlagan Odiljon Iminov.
Avval O‘zbekiston maktabgacha ta’lim vaziri o‘rinbosari Maqsud Yo‘ldoshev “Obqochishga majburmiz” degan so‘zlariga izoh bergandi.
Izoh (0)