Toshkent shahri Sergeli tumanida 28 yoshli erkak o‘zidan 10 yosh kichkina yigit va ularni ajratmoqchi bo‘lgan ayolni pichoqlab qo‘ydi, deya xabar bermoqda Tergov departamenti.

Ma’lum qilinishicha, 2020-yilning 16-noyabr kuni 28 yoshli Alisher M. Toshkent shahar Sergeli tumani Sergeli-2-daha 36-uyning oldida 18 yoshli Ag‘zam Y. bilan janjallashgan.

Qayd etilishicha, Alisher M. o‘zini haqorat qilganligi sababli kelib chiqqan janjal oqibatida oldida bo‘lgan oshxona pichog‘i bilan Ag‘zam Y.ga hamda ularni ajratib, bezorilik harakatlarining oldini olmoqchi bo‘lgan 24 yoshli Shahnoza M.ning tanasini turli joylariga bir necha marotaba urib, tan jarohati yetkazgan.

Oqibatda Ag‘zam Y. va Shahnoza M. tan jarohatlari bilan Respublika shoshilinch tibbiy yordam ilmiy markaziga murojaat qilgan.

Ko‘zdan kechirish jarayonida hodisa joyidan oshxona pichog‘i ashyoviy dalil tariqasida tegishli tartibda rasmiylashtirib olingan.

Mazkur holat yuzasidan Sergeli tumani IIO FMB Tergov bo‘limi tomonidan Alisher M.ga nisbatan Jinoyat kodeksining 277-moddasi 3-qismi “g” bandi (jamoat tartibini saqlash vazifasini bajarib turgan hokimiyat vakili yoki jamoatchilik vakiliga yoxud bezorilik harakatlarining oldini olish chorasini ko‘rgan boshqa fuqarolarga qarshilik ko‘rsatib sodir etilgan bezorilik) bilan jinoyat ishi qo‘zg‘atilgan.

Dastlabki tergov jarayonida Alisher M. gumon qilinuvchi tariqasida ishda ishtirok etishga jalb qilingan va himoyachi ishtirokida so‘roq qilingan. Hozirda tergov harakatlari davom ettirilmoqda.

Avvalroq Toshkentdagi “Zarafshon” savdo-ko‘ngilochar markazi yonida sodir bo‘lgan janjal bo‘yicha IIBB munosabat bildirgani, Toshkent shahar IIBB Yunusobodda tungi klub yonida yuz bergan pichoqbozlik yuzasidan ma’lumot bergani hamda Yuqori Chirchiqda o‘z akasini do‘pposlab, pichoqlagan shaxs qo‘lga olingani haqida xabar berilgan edi.