Toshkent shahrida 18-noyabr kuni kamida 94 ta yo‘l-transport hodisasi qayd etildi. Bu haqda Toshkent shahar Ichki ishlar bosh boshqarmasi xabar berdi.
Toshkent shahar IIBB Yo‘l harakati xavfsizligi boshqarmasi tomonidan taqdim etilgan ma’lumotlarga ko‘ra, poytaxtda kuchli qor yog‘gan 18-noyabrda jami 2395 ta yo‘l harakati qoidalarini buzish holati aniqlangan, shundan 94 ta kichik to‘qnashuv (YTH) sodir bo‘lgan.
Shuningdek, 18-noyabrda Toshkent shahrida spirtli ichimlik ta’siri ostida avtomobil boshqarish bilan bog‘liq 13 ta, svetoforning taqiqlovchi belgisini mensimaslik bo‘yicha 129 ta, zarur hujjatlarsiz avtomobil boshqarish bo‘yicha 169 ta holat qayd etilgan.
Bundan tashqari, 105 ta holatda quvib o‘tish qoidalari buzilgan, 8 ta holatda YHXB xodimining talabiga bo‘ysunmaslik sodir etilgan. Telefondan yoki videomonitordan foydalanish bo‘yicha 27 ta, tegishli hujjatlarsiz oynalarni qoraytirish bo‘yicha 9 ta, qalbaki, o‘zgartirilgan yoki begona davlat raqamini taqish bo‘yicha 1 ta, trotuar va piyodalar yo‘laklari bo‘ylab harakatlanish bo‘yicha 25 ta holat ro‘yxatga olingan. 9 ta holatda to‘xtash va to‘xtab turish qoidalari buzilgan. 102 ta holatda piyodalar tomonidan yo‘l harakati qoidalari buzilgan.
Izoh (0)