O‘zbekiston va Rossiya mudofaa vazirlari 2020-yilning 18 noyabr kuni telefon orqali muloqot qildi, deb xabar berdi Rossiya harbiy idorasi matbuot xizmati.
Rossiya mudofaa vaziri, armiya generali Sergey Shoygu O‘zbekiston mudofaa vaziri, general-mayor Bahodir Qurbonov bilan telefon orqali muzokara o‘tkazdi. Muzokaralar davomida harbiy va harbiy-texnik hamkorlikka oid keng ko‘lamli masalalar muhokama qilindi.
Ma’lum qilinishicha, oktabr oyi oxirida MDH mamlakatlari Qurolli kuchlari shtablari rahbarlari Hamdo‘stlik chegaralaridagi harbiy-siyosiy vaziyatni Samarqandda muhokama qildi. Uchrashuvda Ozarbayjon, Armaniston, Belarus, Qozog‘iston, Qirg‘iziston, Rossiya, Tojikiston va O‘zbekiston harbiy delegatsiyalari hamda MDH Ijroiya qo‘mitasi va MDH mudofaa vazirlari kengashi kotibiyati delegatsiyalari ishtirok etdi.
Qayd etilishicha, uchrashuv kun tartibiga mudofaa va xavfsizlik sohasidagi o‘zaro manfaatli hamkorlik, shuningdek, MDH davlatlari chegaralari bo‘ylab yuzaga kelayotgan harbiy-siyosiy vaziyat to‘g‘risida fikr almashish masalalari kiritildi.
Avvalroq O‘zbekiston va Qozog‘iston davlat chegarasini demarkatsiya qilish masalasini muhokama qilgandi.
Izoh (0)