Ta’lim sifatini nazorat qilish davlat inspeksiyasi O‘zbekistondagi professor-o‘qituvchilar ilmiy salohiyati eng yuqori va eng past bo‘lgan oliy ta’lim muassasalarining ro‘yxatimni e’lon qildi.
OTMlarining ilmiy salohiyati ularda faoliyat ko‘rsatayotgan professor-o‘qituvchilarning ilmiy darajasiga qarab aniqlanadi. Bunda OTMda faoliyati ko‘rsatayotgan jami o‘qituvchilardan (asosiy shtat va ichki o‘rindoshlar) necha foizida ilmiy unvoni va darajasi mavjud qarab baholanadi.
Ma’lum qilinishicha, bugungi kunda milliy OTMlar o‘rtasida professor-o‘qituvchilarning ilmiy salohiyati bo‘yicha eng yuqori o‘rinni qayd etgan Toshkent davlat o‘zbek tili va adabiyoti universitetidagi o‘qituvchilarning 55,1 foizi ilmiy unvon va darajalarga ega, ushbu oliygohda faoliyat olib borayotgan jami 176 nafar o‘qituvchilardan 29 nafari fan doktori va professor, 68 nafari fan nomzodi (PhD) ilmiy darajasiga yoki dotsent unvoniga ega.
Qayd etilishicha, ushbu indikator bo‘yicha navbatdagi o‘rinlarni O‘zbekiston milliy universiteti (52,7 foiz), Samarqand davlat universiteti (51,3 foiz) egallagan.
Ilmiy salohiyat bo‘yicha eng past ko‘rsatkich Samarqand davlat chet tillar instituti (21,3 foiz), Termiz davlat universiteti (20,7 foiz), O‘zbekiston davlat jismoniy tarbiya va sport universiteti (20,7 foiz), Farg‘ona politexnika instituti (19,8 foiz) va Qo‘qon davlat pedagogika instituti (19,4 foiz)da qayd etilgan.
So‘nggi bir yil ichida milliy OTMlarning asosiy shtatdagi professor-o‘qituvchilar soni 10,6 foizga, talabalar soni 25,4 foizga, fan doktori (DSc) ilmiy darajasiga yoki professor unvoniga ega professor-o‘qituvchilar 11,0 foizga, fan nomzodi (PhD) ilmiy darajasiga yoki dotsent unvoniga ega professor-o‘qituvchilar 10,1 foizga, dissertatsiya himoyalari (shuningdek, ilmiy darajaga ega bo‘lmay professor ilmiy unvonini yoki dotsent ilmiy unvonini olgan yoki ularga tenglashtirilgan) 41,1 foizga oshgan.
Mavzuga doir: O‘zbekistonda NTT hamda OTMlarga xalq ta’limi xodimlarining malakasini oshirish huquqi beriladi
Ta’lim inspeksiyasi tomonidan 2020-yilning oktyabr oyida oliy ta’lim muassasalarining milliy reytingi (2020-yil 1-yanvar holatiga) e’lon qilingandi. O‘zbekiston milliy universiteti, Toshkent irrigatsiya va qishloq xo‘jaligini mexanizatsiyalash muhandislari instituti, Samarqand davlat universiteti, Toshkent axborot texnologiyalar universiteti, Toshkent davlat agrar universiteti 2020-yilgi reytingda yetakchi o‘rinlarni egallagan.
Avvalroq O‘zbekiston oliy ta’lim muassasalari va umumta’lim maktablarning milliy reytingi e’lon qilingandi.
Izoh (0)