Klublar o‘rtasidagi 2020-yilgi Jahon chempionatining muddati o‘zgardi.
FIFA matbuot xizmatining ma’lum qilishicha, koronavirus pandemiyasi sabab musobaqa dekabr oyidan 2021-yilning fevraliga ko‘chirildi. Musobaqa Qatarda bo‘lib o‘tadi.
Shu tariqa “Bavariya” bir yil ichida oltita sovringa ega chiqish imkoniyatini qo‘ldan chiqardi va bu borada “Barselona”ning rekordini takrorlay olmaydi. Myunxenliklar 2020-yilda beshta musobaqada g‘olib chiqqandi — chempionat, Germaniya Kubogi va Superkubogi, Chempionlar Ligasi va UEFA Superkubogi.
Klublar o‘rtasidagi Jahon chempionatida har bir mintaqaning eng yaxshi jamoalari va mezbon mamlakat chempioni (“Ad-Duhayl”) ishtirok etadi.
Bu mazkur formatda o‘tadigan so‘nggi musobaqa bo‘ladi. Avvalroq musobaqaning yangi formati tasdiqlangan, unga ko‘ra klublar o‘rtasidagi Jahon chempionat har to‘rt yilda bir marta o‘tkazilishi va unda 24 ta klub ishtirok etishi ma’lum bo‘lgandi.
Yanada ko‘proq futbol va sport yangiliklaridan boxabar bo‘lishni istasangiz, “Daryo”ning Telegram’dagi rasmiy sport kanali — @Daryo_Sport24’ga obuna bo‘ling!
Izoh (0)