Ўзбекистон Миллий олимпия қўмитасининг (МОҚ) мажлислар залида 16 ноябрь, душанба жуни МОҚнинг навбатдан ташқари йиғилиши бўлиб ўтди.
Мажлисда ўзбекистонлик спортчиларни Токио—2020 ва Париж—2024 Олимпия ўйинларига тайёргарлик кўриши ва иштирок этиши жараёнлари, Ўзбекистон МОҚга янги раис ўринбосари вазифасини бажарувчисини сайлаш, Қўмита уставига ўзгартириш киритиш ва янги таҳририни тасдиқлаш, бошқа спорт турларини тан олиш бўйича федерация ва ассоциациялар мурожаатларини кўриб чиқиш каби масалалар ўрин олди.
МОҚ раҳбари Рустам Шоабдураҳмонов спорт фаолиятини ташкил этиш ва ривожлантириш мақсадида жорий этилган янги раис ўринбосари вазифасига Шерзод Тошматов номзодини илгари сурди. Делегатлар раис ўринбосари вазифасини бажарувчи лавозимига кўрсатилган номзод — Ўзбекистон таэквондо WТ ассоциацияси раиси Шерзод Тошматовни бир овоздан маъқуллади.
Тошматов 2009-2010 йилларда Ўзбекистон ҳаваскор ва профессионал муайтай ассоциацияси раиси ўринбосари, 2010—2014 йилларда ушбу ассоциация раиси, 2013-2014 йилларда Шарқ яккакурашлари ва жанг санъатларини ривожлантириш маркази раиси ўринбосари, 2014—2019 йилларда Ўзбекистон бокс федерацияси раисининг биринчи ўринбосари, 2016—2019 йилларда AIBA ижроия қўмитаси аъзоси, Осиё бокс конфедерацияси вице-президенти лавозимларида ишлаган. 2019 йилдан ҳозирги вақтга қадар эса Ўзбекистон таэквондо WТ ассоциацияси раиси ҳисобланади. Пандемия шароитида Шерзод Тошматов МОҚнинг тезкор штаби раҳбари сифатида фаолият юритган.
Янада кўпроқ футбол ва спорт янгиликларидан бохабар бўлишни истасангиз, «Дарё»нинг Telegram’даги расмий спорт канали — @Daryo_Sport24’га обуна бўлинг!
Изоҳ (0)