Voyaga yetmagan 16 yoshli Hamidullo R. 2020-yilning 7-noyabr kuni soat 22:30 larda Namangan shahar “Sohil” MFY hududida maktabdoshi, voyaga yetmagan 17 yoshli Gְ‘iyosiddin N. bilan “Nega yaxshi ko‘rgan qizimga SMS jo‘natding” deb, o‘zaro janjallashgan. Bu haqda Tergov departamenti xabar qilmoqda.
Oqibatda u Gְ‘iyosiddinning qorin sohasiga pichoq bilan bir marotaba qasddan urib, tan jarohati yetkazgan.
Hodisa sodir bo‘lgan joyga yetib borgan tezkor tergov guruhi joyni ko‘zdan kechirib, Bodomzor ko‘chasidan oqib o‘tuvchi ariq bo‘yidan tan jarohati yetkazishda foydalangan bir dona yog‘och sopli oshxona pichog‘i hamda hodisa joydagi qon dog‘larini aniqlab, protsessual tartibda rasmiylashtirgan.
Tibbiy ma’lumotnomaga ko‘ra, jabrlanuvchining qornida sanchilgan, kesilgan tarzidagi jarohati bo‘lib, charvi inventarizatsiyasi, jarohatidan qon sizib chiqishi ko‘rsatilgan.
2020-yilning 9-noyabr kuni ko‘rsatilgan tibbiy muolajalarga qaramasdan jabrlanuvchi kasalxonaning jonlantirish bo‘limida olgan og‘ir tan jarohati oqibatida vafot etgan.
Mazkur holat yuzasidan Namangan shahar bo‘yicha IIO FMB 2-sonli IIB huzuridagi Tergov bo‘linmasi tomonidan fuqaro Hamidullo R.ga nisbatan Jinoyat kodeksining 104-moddasi 3-qismi (jabrlanuvchining o‘lishiga sabab bo‘lgan qasddan badanga og‘ir shikast yetkazish) bilan jinoyat ishi qo‘zg‘atilganga.
Hozirda Hamidullo R.ga nisbatan Jinoyat kodeksining 104-moddasi 3-qismi “d” bandi bilan ayblov e’lon qilinib, qamoqqa olish tarzidagi ehtiyot chorasi qo‘llanilgan.
Hozirda jinoyat ishi bo‘yicha dastlabki tergov harakatlari olib borilmoqda, natijasi haqida qo‘shimcha axborot berilishi ta’kidlangan.
Avvalroq Toshkentda Yoshlar ittifoqi va mahalla faollari suddan o‘z tanishiga 13 marta pichoq urgan yigitni ozodlikdan mahrum etmaslikni so‘ragani, O‘zbekistonda jamoat joylarida sovuq qurol olib yurganlik uchun jarima joriy etilgani hamda Qashqadaryoda qarzini undirmoqchi bo‘lgan yigit qarzdorni pichoqlab qo‘ygani haqida xabar qilingandi.
Izoh (0)