Табиий газни истеъмолчиларга тарқатиш бўйича амалдаги қоидалар Вазирлар Маҳкамасининг 2018 йил 12 январда қабул қилинган 22-сонли қарори билан тартибга солинади. Бу ҳақда Энергетика вазирлиги хабар берди.
Таъкидланишича, табиий газ етказиб бериш ҳар йили тасдиқланадиган параметрларга – маҳаллий ҳокимият органлари билан биргаликда ишлаб чиқилган балансга мувофиқ қатъий риоя қилинган ҳолда амалга оширилади. Энергетика вазирлиги томонидан ҳар йили, 1 декабрга қадар, «Ўзбекнефтгаз» АЖ, «Ўзтрансгаз» АЖ ва «Ҳудудгазтаъминот» АЖ ларига келгуси йил учун истеъмолчиларга табиий газ етказиб беришнинг йиллик ва чораклик ҳажмларини (қиш даври учун ойма-ой) юборилади.
«Аҳоли сони кўпаймоқда, янги ишлаб чиқариш объектлари, АГТКС ва иссиқхоналар газ қувурларига уланмоқда. Шунга кўра, ҳисобланган газ аҳоли ва ижтимоий соҳа объектларига керакли босимда етиб бормай, йўлда катта ҳажмда истеъмол қилинади», — дейилади хабарда.
Ўз навбатида, «Ҳудудгазтаъминот» АЖ мавжуд газ транспорт тизимларининг техник имкониятларини ҳисобга олган ҳолда истеъмолчиларга табиий газ етказиб беришнинг йиллик ва чорак ҳажмларини (қиш даври учун ойма-ой) етказиб беради. Газ таъминоти ташкилотларига истеъмолчиларнинг мурожаатларини (маиший истеъмолчилар бундан мустасно) ажратилган ҳажмлар даражасида қайта кўриб чиқиш ҳуқуқи берилган.
Ушбу биринчи даражали истеъмолчиларни совуқ мавсумда табиий газ билан узлуксиз таъминлаш учун корхоналарни захира ёқилғи турларига ўтказиш жадваллари тузилади ва ушбу жадваллар Вазирлар Маҳкамаси томонидан тасдиқланади. Тасдиқланган жадваллар барча манфаатдор ташкилотларга юборилади.
Ушбу жадваллар табиий газ етказиб беришнинг тахмин қилинган (прогноз) ҳажмлари биринчи даражали истеъмолчиларга, яъни аҳолига ва ижтимоий аҳамиятга эга бўлган объектларга узлуксиз газ етказиб беришни таъминламаган тақдирда кучга киради.
Қарорда жадвалларга киритилган истеъмолчилар ёқилғи таъминотининг камайтирилмайдиган захирасига эга бўлишлари (камида 3 ой давомида эҳтиёжни таъминлаши) ва совуқ тушганда ушбу режимда ишлашга ўтишлари шартлиги назарда турилган.
«Шундан келиб чиқиб, бир қатор юридик шахслар (жумладан, ресторан, кафе каби умумий овқатланиш корхоналари) томонидан шу кунларда захира ёқилғиларига ўтиш бўйича олинган кўрсатмаларда кутилмаган нарса йўқ – ушбу шартлар газ таъминоти билан тузилган шартномаларида аниқ кўрсатилган», — дейилади хабарда.
Аввалроқ Тошкентдаги тадбиркорлар газ таъминоти органи ходимларидан 1 ноябрдан бошлаб газ узатилиши ўчириб қўйилиши тўғрисида огоҳлантириш олаётгани тўғрисида хабар берилганди.
Изоҳ (0)