Fransiya yaqin kunlarda Yevropa Ittifoqi chegaralarida xavfsizlikni ta’minlash uchun Shengen hududini isloh qilish bo‘yicha takliflarni taqdim etadi, dedi mamlakat prezidenti Emmanuel Makron. Bu haqda “Interfaks” xabar berdi.
“Biz Shengen hududini isloh qilishimiz kerak. Avvalo, Yevropa Ittifoqining tashqi chegaralarida xavfsizlikni kuchaytirish uchun”, — dedi Makron.
Uning qo‘shimcha qilishicha, yaqin kunlarda Parij Shengen hududini isloh qilish bo‘yicha taklif bilan chiqadi va uni boshqa Yevropa Ittifoqi davlatlariga taqdim etadi.
Makronning so‘zlariga ko‘ra, Shengen hududini boshqarishni takomillashtirish kerak, chunki hozirgi paytda unda chegaradagi dolzarb masalalarni, shu jumladan, migratsiya va ichki xavfsizlik masalalarini tartibga solish bo‘yicha doimiy siyosiy kuzatuv mavjud emas.
“Shengen kabi erkin harakatlanish hududi Yevropa qurilishining asosiy yutug‘idir. Ammo bu tashqi chegaralarimiz muhofazasi va xavfsizligi va’dasi evaziga ichki chegaralarsiz erkin harakatlanish va’dasiga asoslangan edi. Ushbu ikkinchi va’da yetarlicha bajarilmayapti. Jamoatchilik fikri, terrorchilarga qarshi turayotgan davlatlar, agar Shengen mintaqasini chuqur isloh qilmasak, ular chegaralarimizni ochiq saqlash masalasida uzoq vaqt davomida kelisha olmaydilar. Biz buni bahorda pandemiya sharoitida ko‘rdik, bugun buni terrorizm bilan bog‘liq vaziyatda ko‘rib turibmiz”, — deya qayd etgan Makron.
Shu munosabat bilan Fransiya prezidenti “ichki xavfsizlik kengashiga o‘xshash bir narsa” yaratishni taklif qildi. Uning ta’kidlashicha, Shengen hududini isloh qilish bir vaqtning o‘zida erkinlik va xavfsizlikni ta’minlashni o‘z ichiga oladi.
“Biz Shengen hududini isloh qilishimiz kerak, shunda u xavfsizlik hududi bo‘ladi. Bu Yevropa Ittifoqining tashqi chegaralarini mustahkamlash, Shengen mexanizmi faoliyatini takomillashtirish, shu jumladan, o‘z majburiyatlarini bajarmaganlarga qarshi sanksiyalar, biz ushbu makon boshqaruvini yangilashimiz kerak”, — deya qo‘shimcha qildi Makron.
Yevropa komissiyasi rahbari Ursula fon der Lyayenning aytishicha, Yevrokomissiya dekabr oyining boshlarida Yevropada terrorizmga qarshi kurashning yangilangan dasturini taqdim etadi. Faoliyat yo‘nalishlari qatorida u terrorizmning oldini olish va Yevropa Ittifoqining tashqi chegaralarini himoya qilishni ta’kidladi.
Izoh (0)