Tog‘li Qorabog‘da urush tugaganidan so‘ng Yerevanda bo‘lib o‘tgan ommaviy norozilik namoyishlaridan keyin olti kishi qo‘lga olindi. Ular tartibsizlikka chaqirish, hokimiyatni egallash, konstitutsion tuzumni ag‘darish, parlamentga bosim o‘tkazish va Milliy majlis spikerini kaltaklashda gumonlanmoqda. Bu haqda Armaniston bosh vaziri apparatining rahbari Eduard Agajanyanga tayanib, “Kommersant” xabar berdi.
“Milliy majlis spikeri Ararat Mirzoyanga uyushtirilgan hujum ‘operatsiyasi’ning ikkita faol ishtirokchisi ham qo‘lga olinganlar qatorida. Jinoyatchilarning barchasi qonun doirasida jazoga tortiladi”, — deb yozadi Agajanyan o‘zining Facebook’dagi sahifasiga.
Eslatib o‘tamiz, 10-noyabrga o‘tar kechasi Rossiya prezidenti Vladimir Putin, Ozarbayjon prezidenti Ilhom Aliyev va Armaniston bosh vaziri Nikol Pashinyan Tog‘li Qorabog‘da 10-noyabr soat 00:00 dan boshlab barcha jangovar harakatlarning butunlay to‘xtatilishi haqida uch tomonlama bayonot qabul qilgani ma’lum bo‘ldi. Mazkur bayonotga ko‘ra, Ozarbayjon va Armaniston Qurolli kuchlarining bo‘linmalari egallab turgan joylarida to‘xtaydi. Rossiya tinchlikparvarlari esa Tog‘li Qorabog‘dagi to‘qnashuv chizig‘i hamda uni Armaniston bilan bog‘lovchi koridorda joylashtiriladi.
Qorabog‘ masalasida Pashinyanning qaroridan norozi bo‘lganlar Armaniston hukumati binosini egallab oldi. Bir necha o‘n kishi bosh vazirning xonasi va qarorgohini talab ketdi.
Izoh (0)