Тоғли Қорабоғда уруш тугаганидан сўнг Ереванда бўлиб ўтган оммавий норозилик намойишларидан кейин олти киши қўлга олинди. Улар тартибсизликка чақириш, ҳокимиятни эгаллаш, конституцион тузумни ағдариш, парламентга босим ўтказиш ва Миллий мажлис спикерини калтаклашда гумонланмоқда. Бу ҳақда Арманистон бош вазири аппаратининг раҳбари Эдуард Агажанянга таяниб, «Коммерсантъ» хабар берди.
«Миллий мажлис спикери Арарат Мирзоянга уюштирилган ҳужум ‘операциясиънинг иккита фаол иштирокчиси ҳам қўлга олинганлар қаторида. Жиноятчиларнинг барчаси қонун доирасида жазога тортилади», — деб ёзади Агажанян ўзининг Facebook’даги саҳифасига.
Эслатиб ўтамиз, 10 ноябрга ўтар кечаси Россия президенти Владимир Путин, Озарбайжон президенти Илҳом Алиев ва Арманистон бош вазири Никол Пашинян Тоғли Қорабоғда 10 ноябрь соат 00:00 дан бошлаб барча жанговар ҳаракатларнинг бутунлай тўхтатилиши ҳақида уч томонлама баёнот қабул қилгани маълум бўлди. Мазкур баёнотга кўра, Озарбайжон ва Арманистон Қуролли кучларининг бўлинмалари эгаллаб турган жойларида тўхтайди. Россия тинчликпарварлари эса Тоғли Қорабоғдаги тўқнашув чизиғи ҳамда уни Арманистон билан боғловчи коридорда жойлаштирилади.
Қорабоғ масаласида Пашиняннинг қароридан норози бўлганлар Арманистон ҳукумати биносини эгаллаб олди. Бир неча ўн киши бош вазирнинг хонаси ва қароргоҳини талаб кетди.
Изоҳ (0)