O‘zbekistonda 9 oy davomida qancha avtomobil benzini ishlab chiqarilgani ma’lum qilindi

O‘zbekistonda shu yilning yanvar—sentabr oylarida 769,1 ming tonna avtomobil benzini ishlab chiqarilgan, deya xabar bermoqda Davlat statistika qo‘mitasi.

Qayd etilishicha, o‘tgan yilning mos davriga nisbatan ishlab chiqarish hajmidagi o‘sish 1,4 foizni tashkil etib, ishlab chiqarish hajmi 11,0 ming tonnaga ko‘paygan.

Avtomobil benzini ishlab chiqaruvchi korxonalar tomonidan respublika miqyosida ishlab chiqarilgan avtomobil benzinining jami hajmida eng yuqori ulushga ega bo‘lgan hududlar:

• Buxoro viloyati – 80,6 foiz;
• Farg‘ona viloyati – 18,5 foiz;
• Qashqadaryo viloyati – 1,0 foiz.

O‘zbekiston 2020-yilning 9 oyida xorijiy davlatlarga 55,9 million litr yoki 15,6 million AQSh dollarlik avtomobil benzinini eksport qilgan. Respublikaga xorijiy davlatlardan 152,9 million litr yoki 33,1 million AQSh dollarlik avtomobil benzini import qilingan.

Avvalroq Davlat statistika qo‘mitasi O‘zbekistonda 9 oyda qancha sement ishlab chiqarilgani ma’lum qilgandi.