Futbol bo‘yicha Coca-Cola Superliganing qoldirilgan 18-turi doirasida “Bunyodkor” va “Paxtakor” jamoalari 5-noyabr, payshanba kuni o‘zaro bahs yuritdi.
Uchrashuvning 5-daqiqasidayoq Nurillo To‘xtasinov o‘zining kuchli zarbasi bilan super gol muallifiga aylandi. Bunga mehmonlar birinchi bo‘limda Jaloliddin Masharipovning goli bilan javob qaytardi.
To‘xtasinov ikkinchi bo‘lim debyutida ham gol urgan holda yana jamoasini oldinga boshladi. 80-daqiqada kelib “Paxtakor” Abdulla Abdullayevning avtogolidan keyin muvozanatni tiklashga muvaffaq bo‘ldi. Biroq “qaldirg‘ochlar” bunga darhol javob qaytardi: Mirjahon Mirahmadov uchinchi golni urgan holda maydon egalariga g‘alaba keltirdi.
81-daqiqada Hojiakbar Alijonov ikkinchi sariq kartochkasini olib maydonni tark etdi. Oradan ko‘p o‘tmay Masharipov raqib futbolchisiga tirsagi bilan zarba bergani uchun chetlatildi.
Ushbu g‘alabadan keyin Vadim Abramov jamoasining ochkolari 36 taga yetdi. “Paxtakor” esa muddatidan avval chempionlikni naqd qilish imkoniyatini bu o‘yinda qo‘ldan chiqardi.
Coca-Cola Superliga
18-tur bahsi
5-noyabr, payshanba
“Bunyodkor” — “Paxtakor” 3:2
Gollar: 1:0 – 5 To‘xtasinov, 1:1 – 26 Masharipov, 2:1 – 55 To‘xtasinov, 2:2 – 80, avtogol Abdullayev, 3:2 – 81 Mirahmadov.“Bunyodkor”: Abdumavlon Abdujalilov, Islom Qobilov, Ibrohimhalil Yo‘ldoshev, Xurshid G‘iyosov (Dilshodbek Ahmadaliyev, 54), Rasul Yo‘ldoshev (Suhrob Izzatov, 78), Lutfulla To‘rayev, Sanjar Qodirqulov, Nurillo To‘xtasinov, Ulug‘bek Abdullayev (Mirjahon Mirahmadov, 78), Abdulla Abdullayev, Shahboz Erkinov (Selim Nurmuradov, 60).
“Paxtakor”: Eldor Suyunov, Hojiakbar Alijonov, Anzur Ismoilov, Jaloliddin Masharipov, Dragan Cheran, Igor Sergeyev (Eren Derdiyok, 61), Yegor Krimets, Doston Hamdamov (Javohir Sidiqov, 73), Odil Hamrobekov (Vladimir Kozak, 90+2), Sardor Sobirxo‘jayev (Abror Ismoilov, 61), Farruh Sayfiyev.
Ogohlantirishlar: Yo‘ldoshev (20), Krimets (21), Alijonov (38), Abdujalilov (84).
Chetlatish: Alijonov (81), Masharipov (83).
Yanada ko‘proq futbol va sport yangiliklaridan boxabar bo‘lishni istasangiz, “Daryo”ning Telegram’dagi rasmiy sport kanali — @Daryo_Sport24’ga obuna bo‘ling!
Izoh (0)