Xarid davomida yoki turli aksiya vaqtlarida narxi bo‘lishi mumkin bo‘lganidan arzon kiyim-kechaklarni ko‘rib ularni sotib olishga shoshilmang. Shunday libos va aksessuarlar borki, ularning narxi arzon bo‘lishi mumkin emas.
Kashemir
Kiyim yorlig‘i bilan yaxshilab tanishib chiqing. Arzon do‘kondagi kiyim yorlig‘iga kashemir deb yozib qo‘yilgani bilan mato tarkibida 2 foiz kashemir qolgan 98 foizi esa akril, poliyester bo‘lishi mumkin. Ishonchingiz komil bo‘lsin, sifatli kashemir matosidan tikilgan sviter hech qachon arzon narxda bo‘lmaydi. Buni bilmagan holda puliga uchib olib qo‘ysangiz, tez orada sifati buziladigan kiyim bilan garderobingizni to‘ldirgan bo‘lasiz. Undan ko‘ra bir marta yaxshisini qimmatga xarid qiling, shunda uzoq vaqt kiyasiz va o‘rniga boshqa olishingizga hojat qolmaydi.
Ipak
Ushbu shohona matodan tikilgan libos bilan har kim ham garderobini bezashni istaydi. Ipak libos o‘ziga xos sanaladi va alohida kunlar va ziyofatlar uchun ayni muddao hisoblanadi. Sun’iy ipak yoki shunga o‘xshash matodan tikilgan liboslarni xarid qilish tavsiya qilinmaydi. Unday matoni ushlab ko‘rishning o‘zida tabiiy ipak emasligini bilsa bo‘ladi. Qolaversa, bir marta yuvilganidan keyin sifati ham ko‘rinishi ham o‘zgaradi va xaridga ishlatgan pullaringiz osmonga uchadi.
Ofisga kiyiladigan ko‘ylak
Arzon va qimmat ko‘ylakni bir ko‘rishda ajratib olish mumkin. Ishga sifati o‘rtacha bo‘lgan kiyim kiysa ham bo‘laveradi deb o‘ylash xato, chunki libosning xodim muvaffaqiyati va o‘ziga beradigan bahosiga ta’sir qilishi allaqachon aniqlangan. Bu budjetingiz ko‘tarmaydigan darajada pul sarflashingiz kerakligini bildirmaydi, shunchaki arzon sifatsiz libosga tez-tez pul sarflagandan ko‘ra sharoitingizdan kelib chiqqan holda bir marta qimmatroq bo‘lsa ham sifatlisini xarid qiling. Arzon va sifatsiz ofis kiyimining tugmalari kichkina, yoqasi ingichka, o‘lchamingiz bo‘lsa ham choklari tortilib turadigan bo‘ladi. Bunday ko‘ylakning sifati dazmol qilganidan keyin o‘zgaradi. Sifatlisida esa yuqoridagi ta’riflarning aksi bo‘ladi.
Poyabzal
Sifatsiz poyabzal xarid qilish orqali siz nafaqat pullaringizni, balki salomatligingizni ham yo‘qotishingiz mumkin. Oyoqni siqadigan, qattiq matoli poyabzal kiyganda qon yaxshi aylanmaydi, har safar yurgandan keyin oyoqda og‘riq seziladi. Uyga tezroq borib, oyoq kiyimingizni tezroq yechishni istasangiz, ishonavering siz poyabzal borasida noto‘g‘ri tanlov qilgansiz. Hali ham bo‘lsa kech emas: noqulay, harakatlanish qiyin bo‘lgan poyabzalni qulay va sifatlisiga almashtiring. Unutmang, charm yumshoq bo‘lishi, tagcharmi mustahkam, poshna qulay bo‘lishi kerak. Shundagina bunday poyabzal sizga uzoq yillar davomida xizmat qiladi.
Kamar
Sifatli kamar sizni obrazingizga ko‘rk berish bilan birga bir necha yillar davomida garderobingizdan o‘rin olishi mumkin. Yaxshi kamarda iz qolmaydi, iplari chiqib qolmaydi. Bir marta yaxshisini xarid qilsangiz, keyin ancha vaqtgacha yangisini xarid qilish haqida o‘ylamasangiz ham bo‘laveradi.
Mavzuga doir:
Izoh (0)