Харид давомида ёки турли акция вақтларида нархи бўлиши мумкин бўлганидан арзон кийим-кечакларни кўриб уларни сотиб олишга шошилманг. Шундай либос ва аксессуарлар борки, уларнинг нархи арзон бўлиши мумкин эмас.
Кашемир
Кийим ёрлиғи билан яхшилаб танишиб чиқинг. Арзон дўкондаги кийим ёрлиғига кашемир деб ёзиб қўйилгани билан мато таркибида 2 фоиз кашемир қолган 98 фоизи эса акрил, полиестер бўлиши мумкин. Ишончингиз комил бўлсин, сифатли кашемир матосидан тикилган свитер ҳеч қачон арзон нархда бўлмайди. Буни билмаган ҳолда пулига учиб олиб қўйсангиз, тез орада сифати бузиладиган кийим билан гардеробингизни тўлдирган бўласиз. Ундан кўра бир марта яхшисини қимматга харид қилинг, шунда узоқ вақт киясиз ва ўрнига бошқа олишингизга ҳожат қолмайди.
Ипак
Ушбу шоҳона матодан тикилган либос билан ҳар ким ҳам гардеробини безашни истайди. Ипак либос ўзига хос саналади ва алоҳида кунлар ва зиёфатлар учун айни муддао ҳисобланади. Сунъий ипак ёки шунга ўхшаш матодан тикилган либосларни харид қилиш тавсия қилинмайди. Ундай матони ушлаб кўришнинг ўзида табиий ипак эмаслигини билса бўлади. Қолаверса, бир марта ювилганидан кейин сифати ҳам кўриниши ҳам ўзгаради ва харидга ишлатган пулларингиз осмонга учади.
Офисга кийиладиган кўйлак
Арзон ва қиммат кўйлакни бир кўришда ажратиб олиш мумкин. Ишга сифати ўртача бўлган кийим кийса ҳам бўлаверади деб ўйлаш хато, чунки либоснинг ходим муваффақияти ва ўзига берадиган баҳосига таъсир қилиши аллақачон аниқланган. Бу бюджетингиз кўтармайдиган даражада пул сарфлашингиз кераклигини билдирмайди, шунчаки арзон сифатсиз либосга тез-тез пул сарфлагандан кўра шароитингиздан келиб чиққан ҳолда бир марта қимматроқ бўлса ҳам сифатлисини харид қилинг. Арзон ва сифатсиз офис кийимининг тугмалари кичкина, ёқаси ингичка, ўлчамингиз бўлса ҳам чоклари тортилиб турадиган бўлади. Бундай кўйлакнинг сифати дазмол қилганидан кейин ўзгаради. Сифатлисида эса юқоридаги таърифларнинг акси бўлади.
Пойабзал
Сифатсиз пойабзал харид қилиш орқали сиз нафақат пулларингизни, балки саломатлигингизни ҳам йўқотишингиз мумкин. Оёқни сиқадиган, қаттиқ матоли пойабзал кийганда қон яхши айланмайди, ҳар сафар юргандан кейин оёқда оғриқ сезилади. Уйга тезроқ бориб, оёқ кийимингизни тезроқ ечишни истасангиз, ишонаверинг сиз пойабзал борасида нотўғри танлов қилгансиз. Ҳали ҳам бўлса кеч эмас: ноқулай, ҳаракатланиш қийин бўлган пойабзални қулай ва сифатлисига алмаштиринг. Унутманг, чарм юмшоқ бўлиши, тагчарми мустаҳкам, пошна қулай бўлиши керак. Шундагина бундай пойабзал сизга узоқ йиллар давомида хизмат қилади.
Камар
Сифатли камар сизни образингизга кўрк бериш билан бирга бир неча йиллар давомида гардеробингиздан ўрин олиши мумкин. Яхши камарда из қолмайди, иплари чиқиб қолмайди. Бир марта яхшисини харид қилсангиз, кейин анча вақтгача янгисини харид қилиш ҳақида ўйламасангиз ҳам бўлаверади.
Изоҳ (0)