Islomshunos olim, professor Ubaydulla Uvatov vafot etdi. Bu haqda O‘zbekiston musulmonlari idorasi xabar berdi.
Ubaydulla Uvatov 1940-yil 23-fevralda Qashqadaryo viloyati G‘uzor tumanida tavallud topgan. 1958—1964-yillarda Toshkent davlat universiteti talabasi bo‘lgan. Misr, Iroq va Liviya mamlakatlarida tarjimonlik faoliyati bilan shug‘ullangan.
Ubaydulla Uvatov Toshkent davlat sharqshunoslik instituti, Prezident administratsiyasi, Din ishlari bo‘yicha qo‘mita, “Amir Temur”, “Oltin meros” jamg‘armalari, Imom Buxoriy xalqaro markazi, Imom Termiziy xalqaro ilmiy-tadqiqot markazi va Xalqaro islom akademiyasida faoliyat olib borgan.
“U yurtimizdan yetishib chiqqan allomalarning hayoti va ilmiy-ma’naviy merosini xalqning ma’naviy mulkiga aylantirish borasida salmoqli ishlarni amalga oshirdi”, — deyiladi xabarda.
Olimning samarali mehnatlari munosib qadrlanib, 2017-yilda “O‘zbekiston Respublikasida xizmat ko‘rsatgan yoshlar murabbiysi” faxriy unvoni, “Mehnat shuhrati” ordeni va 2020-yilda “Fidokorona xizmatlari uchun” ordeni bilan taqdirlangan.
Avvalroq Shayx Alouddin Mansur 68 yoshida, shuningdek, taniqli turkolog Andrey Kubatin vafot etgani haqida xabar berilgan edi.
Izoh (0)