Raspberry Pi 400 taqdim etildi: klaviaturada joylashgan mini-kompyuter

Raspberry kompaniyasi kichik klaviatura ichidan o‘rin olgan birinchi universal mini-kompyuterni taqdim etdi, deb xabar beradi Hi-Tech.Mail.ru.

Internet, hujjatlar bilan ishlash, dasturlashni o‘rgatish va boshqa vazifalarni bajarish imkonini beradigan ARM protsessoriga ega Raspberry Pi 400 kichkina kompyuterga joylashtirildi. Kompyuter klaviatura korpusidan joy olgan, unga faqatgina monitor ulansa kifoya — buning uchun korpusda ikkita HDMI mavjud.

Kompyuterning texnik tavsifi ham yomon emas — 1,8 gigagerts maksimal chastota va 4 gigabayt tezkor xotiraga ega 4 yadroli Cortex-A72. Unga turli operatsion tizimlarni, jumladan, Windows 10’ni ham o‘rnatish mumkin. Shuningdek, undan portlar jamlanmasi ham o‘rin olgan — ikkita USB 3.0, bitta USB 2.0, microSD uchun slot va hatto LAN-port. Yana Wi-Fi va Bluetooth ham mavjud.

Unga sichqoncha va istalgan monitor yoki televizorni ulab, tayyor kompyuter sifatida foydalanish mumkin. Eng muhim jihati, bu kabi kompyuter narxi 70 dollar atrofida.

Eslatib o‘tamiz, shu yilning aprel oyida Xitoyning Chuwi kompaniyasi kattaligi olma yoki limondek keladigan LarkBox nomli mini-kompyuterni taqdim etgandi. May oxirlarida sotuvga chiqishi kutilgan ushbu kompyuter narxi 199 dollarni tashkil etgan.