Sirdaryo viloyatida yuz bergan texnogen falokat oqibatida Mirzaobod, Oqoltin va Sardoba tumanidagi o‘ndan ziyod maktab va maktab filiali jiddiy zarar ko‘rgan. Davlat budjetidan ajratilgan 51 milliard 300 million so‘m mablag‘ evaziga qisqa vaqt ichida barcha ta’lim maskanlari qayta ta’mirlanib, o‘quv yili an’anaviy tarzda boshlandi. Bu haqda 29-oktabr kuni viloyatga uyushtirilgan press-tur davomida ma’lum qilindi.
Tadbir davomida Oliy Majlis Qonunchilik palatasi deputatlari hamda jurnalistlar Mirzaobod tumanidagi zamonaviy qiyofaga kirgan 17-umumta’lim maktabida bo‘lishdi.
OAV vakillariga intervyu bergan xalq ta’limi vaziri Sherzod Shermatovning aytishicha, uchala tumandagi 17 ta maktabda qurilish-ta’mirlash ishlari olib borilgan. Bitta maktab yangidan barpo etilgan bo‘lsa, yana birida qo‘shimcha obyekt qurilgan.
“Ochig‘ini aytish kerak, mazkur tumanlardagi maktablar o‘n yillab davlat dasturiga kiritilmagan edi, juda og‘ir holatda bo‘lgan. Birortasida optik tolali internet ham yo‘q edi. 3-4 oy davomida hamma maktab mukammal ta’mirlanib, to‘liq jihozlandi. Barchasiga optik tolali internet olib kirildi, zamonaviy kompyuter jihozlari qo‘yildi. Endigi vazifamiz ushbu muassasalarda ta’lim berish sifatini oshirish. O‘quvchilarga chet tillari va axborot texnologiyalarini yaxshi o‘rgatishga ko‘proq ahamiyat qaratmoqchimiz. Chunki bolalar uyda o‘tirib ham mustaqil tarzda daromad topish imkoniga ega bo‘lsin.
Kadrlar tayyorlash masalasi ham e’tiborimizda. Viloyat malaka oshirish markazining filialini ochish harakatidamiz”, — dedi Shermatov, deya uning so‘zlarini keltirmoqda “Daryo” muxbiri Mirolim Isajonov.
Izoh (0)