O‘zbekistonda yagona bo‘lgan Qorako‘ldagi xalqaro matematika maktabining shaxsiy o‘quv binosi yo‘qligi sabab Prezident topshirig‘iga ko‘ra xalqaro maktabga bino qurib berish uchun 50 milliard so‘m ajratilgan va bugungi kunda qurilish ishlari 85 foizga yakunlangan. Bu haqda Qorako‘ldagi xalqaro maktab direktori bilan suhbatlashgan “Daryo” muxbiri xabar berdi.
Xalqaro olimpiada maktabi direktori Temur Ro‘ziyevning ma’lumot berishicha, maktab faoliyatiga 10 yil to‘lgan.
“Maktabimiz shu davr mobaynida hatto o‘z binosiga ham ega emasdi. Shu sabab Prezidentimiz topshirig‘iga ko‘ra, bizga 720 o‘rinli yangi maktab qurib berilmoqda. Yangi binoda 320 o‘rinli yotoqxonadan tashqari 50 o‘rinli mehmonxona ham mavjud bo‘ladi”, — deydi maktab direktori.
Ta’kidlanishicha, ayni kunda maktabda 460 nafar o‘quvchi tahsil oladi. 2020-yilgi kirish imtihonlarida maktabning 48 nafar bitiruvchisining barchasi OTM talabasiga aylangan.
“Har yili 90 nafar o‘quvchi qabul qilamiz. O‘quvchilarimiz Davlat test markazi tomonidan tuzilgan testlarni yechib, natijaga qarab o‘qishga qabul qilinadi”, — deydi Temur Ro‘ziyev.
Maktab direktorining qo‘shimcha qilishicha, ushbu ta’lim dargohida faoliyat yurituvchi o‘qituvchilar 8 million so‘mgacha maosh oladi. Maktab direktori esa 6-6,5 million so‘m maoshga faoliyat yuritadi.
Eslatib o‘tamiz, Prezident Shavkat Mirziyoyev o‘qituvchi va murabbiylar bayramiga bag‘ishlangan tabrigida “Qorako‘l maktabi biz uchun zamonaviy maktabning haqiqiy andozasi emasmi? Nima uchun Xalq ta’limi vazirligi uning noyob tajribasini yetarlicha ommalashtirmayapti? Nima uchun boshqa maktab direktorlari bu ta’lim dargohidan ibrat olmayapti? Xalq ta’limi vaziri Sh.Shermatov nega uch yildan buyon bu jiddiy masalaga yetarlicha e’tibor bermayapti?”. Afsuski, hammamiz ‘Oldingdan oqqan suvning qadri yo‘q’, deb, beparvo bo‘lib yuribmiz.
Nima uchun boshqa viloyatlarda, deylik, Andijonda, Farg‘ona, Samarqand, Xorazm yoki Qarshida, Jizzax va Sirdaryoda bunday maktablar yo‘q? Vaholanki, bugungi kunda bizga mana shunday yuzlab maktablar, o‘z kasbining chinakam ustasi va fidoyisi bo‘lgan minglab murabbiylar suv bilan havoday zarur. Shu munosabat bilan Xalq ta’limi vazirligi hududlar rahbarlari bilan birgalikda har bir tumanda kamida bittadan mana shunday maktab yaratish choralarini ko‘rishi zarur”, degandi.
Izoh (0)