O‘zbekistondagi Milliy reytingning kuchli uchligiga kirgan oliy ta’lim muassasalariga akademik va moliyaviy mustaqillik beriladi. Bu haqda Ta’lim sifatini nazorat qilish davlat inspeksiyasi boshlig‘i Ulug‘bek Toshkenboyev AOKAda o‘tkazilgan matbuot anjumanida ma’lum qildi.
Ulug‘bek Toshkenboyevning so‘zlariga ko‘ra, oliy ta’lim muassasalarining milliy reytingida so‘nggi 5 yil davomida doimiy ravishda birinchi 3 ta o‘rindan birini egallagan OTMlarga oliy ma’lumotli kadrlar tayyorlash bo‘yicha akademik va moliyaviy mustaqillik beriladi.
Akademik va moliyaviy mustaqillikni belgilashda esa xalqaro ta’rif va standartlarga asoslaniladi, ya’ni mustaqillik mezonlari Yevropa universitetlari assotsiatsiyasi standartlariga muvofiq qabul qilinishi belgilanmoqda.
Eslatib o‘tamiz, O‘zbekistonda ilk marta OTMlar reytingi 2018-yilda tuzilgandi. Vazirlar Mahkamasi huzuridagi Ta’lim sifatini nazorat qilish davlat inspeksiyasi oktabr o‘rtalarida 2020-yil bo‘yicha OTMlarning milliy reytingini e’lon qildi. Unga ko‘ra, gumanitar va iqtisodiy sohada O‘zbekiston Milliy universiteti, Samarqand davlat universiteti, Toshkent moliya instituti, Toshkent davlat o‘zbek tili va adabiyoti universiteti yetakchi o‘rinlarni egallagan.
Izoh (0)