Ўзбекистонда ягона бўлган Қоракўлдаги халқаро математика мактабининг шахсий ўқув биноси йўқлиги сабаб Президент топшириғига кўра халқаро мактабга бино қуриб бериш учун 50 миллиард сўм ажратилган ва бугунги кунда қурилиш ишлари 85 фоизга якунланган. Бу ҳақда Қоракўлдаги халқаро мактаб директори билан суҳбатлашган «Дарё» мухбири хабар берди.
Халқаро олимпиада мактаби директори Темур Рўзиевнинг маълумот беришича, мактаб фаолиятига 10 йил тўлган.
«Мактабимиз шу давр мобайнида ҳатто ўз биносига ҳам эга эмасди. Шу сабаб Президентимиз топшириғига кўра, бизга 720 ўринли янги мактаб қуриб берилмоқда. Янги бинода 320 ўринли ётоқхонадан ташқари 50 ўринли меҳмонхона ҳам мавжуд бўлади», — дейди мактаб директори.
Таъкидланишича, айни кунда мактабда 460 нафар ўқувчи таҳсил олади. 2020 йилги кириш имтиҳонларида мактабнинг 48 нафар битирувчисининг барчаси ОТМ талабасига айланган.
«Ҳар йили 90 нафар ўқувчи қабул қиламиз. Ўқувчиларимиз Давлат тест маркази томонидан тузилган тестларни ечиб, натижага қараб ўқишга қабул қилинади», — дейди Темур Рўзиев.
Мактаб директорининг қўшимча қилишича, ушбу таълим даргоҳида фаолият юритувчи ўқитувчилар 8 миллион сўмгача маош олади. Мактаб директори эса 6-6,5 миллион сўм маошга фаолият юритади.
Эслатиб ўтамиз, Президент Шавкат Мирзиёев ўқитувчи ва мураббийлар байрамига бағишланган табригида «Қоракўл мактаби биз учун замонавий мактабнинг ҳақиқий андозаси эмасми? Нима учун Халқ таълими вазирлиги унинг ноёб тажрибасини етарлича оммалаштирмаяпти? Нима учун бошқа мактаб директорлари бу таълим даргоҳидан ибрат олмаяпти? Халқ таълими вазири Ш.Шерматов нега уч йилдан буён бу жиддий масалага етарлича эътибор бермаяпти?». Афсуски, ҳаммамиз ‘Олдингдан оққан сувнинг қадри йўқ’, деб, бепарво бўлиб юрибмиз.
Нима учун бошқа вилоятларда, дейлик, Андижонда, Фарғона, Самарқанд, Хоразм ёки Қаршида, Жиззах ва Сирдарёда бундай мактаблар йўқ? Ваҳоланки, бугунги кунда бизга мана шундай юзлаб мактаблар, ўз касбининг чинакам устаси ва фидойиси бўлган минглаб мураббийлар сув билан ҳаводай зарур. Шу муносабат билан Халқ таълими вазирлиги ҳудудлар раҳбарлари билан биргаликда ҳар бир туманда камида биттадан мана шундай мактаб яратиш чораларини кўриши зарур», деганди.
Изоҳ (0)