Журналист Алишер Рўзиохунов ички ишлар ходимлари уни сабабсиз калтаклаганини маълум қилиб, ўзининг Telegram каналида ички ишлар вазири Пўлат Бобожоновга мурожаат йўллади.
23 октябрь куни эълон қилинган ушбу мурожаат «Вазир Бобожонов, илтимос, истеъфо беринг. Негаки сизнинг ходимларингиз фуқароларни ҳақоратлаб, калтаклашда давом этяпти. Сиз тизимни ўзгартира олмаяпсиз», сўзлари билан бошланган.
Журналистнинг ёзишича, 23 октябрь куни тунги вақтда чорраҳадан ўтаётганида йўл ҳаракати ходими бир машинани тўхтатган. «У йўл ёқасида турган инспектор хизмат машинасига ёнма-ён, йўлнинг иккинчи йўлагига тўхтади. Инспектор эса йўлнинг учинчи йўлагидан ҳайдовчи эшиги томон юриб келаётганди. Мен йўлдаги тирбандлик ва вазиятни кўриб, аранг учинчи ва тўртинчи бўлак орасига тушиб қолдим. Шундай инспекторнинг қўли машинамнинг ўнг ён ойнасига тегиб кетди. Шу жойдан қочмай, инспектор келишини кутдим, унга йўл ўртасига сал эътибор билан чиқишини айтганим билан можаро бошланди», — дейди Алишер Рўзиохунов.
Унинг айтишича, 6 дан ортиқ ходим ҳамма ишини қўйиб уни ўраб олган. «Инспектор ҳужжатларимни талаб қилди. Бердим. Шу орада қий-чув қилиб, ходимлар ‘буни расмийлаштир, одам урди’ деб ақл ўргата бошлади. Мен сал шокка тушдим», — дейди у.
Шу орада журналист шаҳар ИИББда кимни таниса, қўнғироқ қилиб, англашилмовчилик билан ишни жиддийлаштираётганини тушунтирган. «Инспектор телефонимни олиб бир четга ўтиб кетди. Гўшакни нариёғидаги одам вазиятни унинг оғзидан эшитаётганди. Шу пайтдан ниқобда, ҳеч қандай таниш белгиси бўлмаган 2 нафар ходимнинг бири дубинка билан қорнимга солди. Ҳеч қандай сабаб йўқ. Айнан шу ходим менсимай, ҳақоратлаб гаплаша бошлади. Буни тушунмадим, аммо вазият кескинлашиб кетмаслиги учун хўп, ака деб тургандим. Шу хўп сўзим ҳам ёқмади шекилли. Дубинка зарбидан икки букилиб ерга ўтирдим. Қолганлар масхара қилишни бошлади. Актёр экан, тегма, ҳозир ўзига келади, деб.
Инспектор телефонда суҳбатни тугатиб, қайтиб келди ва мен журналист эканимни қолганларга айтди. 10 дақиқадан сўнг атрофдаги ходимлари тумтарақай бўлди. Инспектор ва зудлик билан шу жойга етиб келган раҳбари мени юпатиб кечирим сўради. Мен қабул қилдим. Аммо гап уларда эмасди. Хуллас, вазир жаноблари, иккиюзламачи, ўзбошимча ва ваколатини суиистеъмол қилиб, одам урадиган, ҳақоратлайдиган ходимларингизни ислоҳ қилолмаяпсиз. Буни эплайдиган одамга ўрнингизни бўшатиб беринг», — дейди Алишер Рўзиохунов ва айби бўлган тақдирда инспектордан расмийлаштиришни 5 марта сўраганини айтган.
Тошкент шаҳар ИИББ Алишер Рўзиохунов билан содир бўлган ҳолат юзасидан муносабат билдирди. Унда Тошкент шаҳар ИИББ томонидан мазкур маълумот ўрганиб чиқилиб, воқеада иштирок этган барча ходимларнинг ҳамда фуқаро Алишер Рўзиохуновнинг хатти-ҳаракатларига ҳуқуқий баҳо берилиши айтилган. ИИББ, шунингдек, фуқаролардан, блогер ва журналистлардан «ўз мавқейини рўкач қилиб, ички ишлар органлари ходимларининг ишларига халақит бермасликларини, ижтимоий тармоқларда ўзи билан содир бўлган воқеаларни бузиб, оммага намойиш қилмасликларини» сўраган.
Бунга жавобан эса журналист мазкур ҳолатда ИИБ ходимларига бирор марта журналист эканим рўкач қилмагани, иш жойини тилга олинмагани ва ўзимни оддий ҳайдовчи сифатида тутганини билдирган. Шунингдек, «ИИББ мен билан юз берган ҳолат бўйича барча томон ҳаракатига ҳуқуқий баҳо берилади, деб айтяпти-ю, аввалдан хулосани ҳам тақдим этяпти. Демак, мен содир бўлган воқеани бузиб талқин этганман?», деб ёзган.
Ушбу ҳолат бўйича Миллий масс-медиани қўллаб-қувватлаш ва ривожлантириш жамоат фонди Васийлик кенгаши раиси Комил Алламжонов ва унинг ўринбосари Саида Мирзиёева ҳам муносабат билдирди.
«Куни кеча журналист Алишер Рўзиохунов билан бўлиб ўтган ҳолатдан биз хавотирдамиз. Журналист ўз саҳифасида ёзган гаплари рост бўлса, уни ҳақиқатан ҳам ички ишлар ходимлари дубинка билан калтаклаган бўлса, биз ушбу ҳолат юзасидан хизмат текшируви ўтказиб, масалага ойдинлик киритилишини, айбдорларга нисбатан жазо чораси қўлланилишини Ўзбекистон Республикаси Ички ишлар вазирлигидан сўраймиз. Журналист томонидан қонун бузилган тақдирда ҳам унга нисбатан қўл кўтарилиши мумкин эмас. Ва қонун барча учун баробар бўлиши керак. Ушбу ҳолатни биз диққат билан кузатиб борамиз», — деган Комил Алламжонов.
«Албатта, қонун барча учун баробар бўлиши керак. Хоҳ у оддий фуқаро, ёки журналист бўлсин, лекин хизмат вазифасидаги ходимлар одамларга қўл кўтаришига қаршимиз. Журналистларни биз ҳар қандай ҳолатда ҳам ҳимоя қиламиз», — дея муносабат билдирди Саида Мирзиёева.
Изоҳ (0)