Aktyorlar mahoratli ijrosidan tashqari, dovyuraklik bilan tryuklarni amalga oshirishni ham yaxshi ko‘radi. Shuningdek, o‘ziga ishongan yulduzlar bunday qaltis harakatlarni kaskadyorlarga topshirishni xohlamaydi. Ammo bu jarayonda bir qancha kutilmagan holatlar tufayli baxtsiz hodisalar ham yuz berishi mumkin. Ekranda muvaffaqiyatli ko‘ringan sahnalar ortida ijodiy guruhning mashaqqati yotganini aktyorlarga yetgan jarohatdan ham bilish mumkin.
Amitabx Bachchan
Bollivudning eng faol aktyorlaridan biri Amitabx Bachchan bemalol yoshlar bilan ham bellasha oladi. Ammo yaqinda aktyor suratga olish maydonchasida qovurg‘asidan jarohat olgan. Xabarlarga ko‘ra, aktyor yuqori qovurg‘asi sinishi natijasida belning pastki qismidagi og‘riqdan aziyat chekkan. Lekin barcha qiyinchiliklarga qaramay, tanaffus qilishdan bosh tortgan aktyor suratga tushish ishlarini davom ettirgan.
Bunday hollar aktyorning ish faoliyatida ko‘p uchraydi. Masalan, “Hammol” filmining sahnalaridan birida aktyor temir stol ustiga yiqilishi kerak bo‘lgan. Ammo Bachchanning biroz muvozanatdan chiqishi natijasida stolning cheti uning qornini jarohatlagan. Qorataloq yorilib ketganligi tufayli aktyorning hayoti xavf ostida qolgan.
Dastlab aktyorning mahoratiga atrofda qarsaklar chalingan. Bachchan jimgina minnatdorlik bildirib, tashqariga chiqqan zahotiyoq yiqilgan. U Mumbayda bir necha hafta komada yotgan. O‘shanda deyarli hamma uni yo‘qotdik, deb o‘ylagandi. Bir necha oydan so‘ng aktyor asta-sekin oyoqqa tura boshlagan.
Dipika Padukone
Dipika Padukone o‘zining Twitterdagi sahifasida suratga tushish vaqtida olgan tan jarohatining suratini joylashtirdi. Uning suratga “Hammasi yaxshi bo‘ladi”, deb yozgan izohi jarohatning ahamiyatsiz ekanligidan darak beradi. Mana buni haqiqiy aktrisa deyish mumkin.
Ritik Roshan
Sahnalardan birining suratga olish jarayonida aktyor Ritik Roshan oyog‘idan jarohat olgan. Otasining aytishicha, Ritik to‘rt hafta mobaynida uyda dam olishni so‘ragan. Bu aktyorning bunday vaziyatda birinchi marta jarohatlanishi edi. Shundan so‘ng aktyor suratga olish ishlarini to‘xtatishiga to‘g‘ri keldi.
Kajol
“Hayotda hamma narsa bo‘ladi” kartinasining suratga olish maydonchasida Kajolning to‘satdan qoqilib ketishi tufayli film mashhurlikka erishdi va shundan so‘ng ijodiy guruh orasida baxtsiz hodisalar filmlarga omad keltiradi, degan fikr paydo bo‘ldi. Kajolning so‘zlariga ko‘ra, u suratga olish paytida yiqilib tushib, bir yarim soat davomida hech kimni taniy olmagan. Ajay Devganga qo‘ng‘iroq qilinganda uning ovozini darhol tanib, uzoq gaplashgan va shunday keyingina o‘ziga kelgan.
Amir Xon
“Dangal” filmini suratga olish jarayonida Amir Xon yelkasidan jiddiy jarohat olgan. Aktyor filmda yordamchi ijrochidan foydalanmaganligi tufayli qattiq charchaydi. Amir Xon bir necha rakursda olinadigan uzoq harakatlarni ketma-ket bajardi. U oxirgi dublga yetib kelganida yarim soat dam olishni xohladi, sababi chidab bo‘lmas darajada azob tortayotgan edi. Uning o‘rnidan turishga ham imkoni bo‘lmadi. Aktyor shifoxonaga yotqizilgandan so‘ng yelkasida jiddiy jarohat borligi aniqlangan.
Shohrux Xon
Mahoratli aktyor Shohrux Xon “Yangi yilingiz bilan” filmini Mumbaydagi besh yulduzli mehmonxonada suratga olish paytida jarohat oldi. Ma’lum bo‘lishicha, eshik uning boshi va yelkasiga tushgan. Aktyor zudlik bilan Nanavati shifoxonasiga yotqizilgan. Bu aktyorning suratga olish maydonchasida jarohatlanishining birinchisi va oxirgisi ham emas.
Akshay Kumar
Akshay Kumar filmda bir nechta tryuk bajarishiga to‘g‘ri keldi, ulardan biri yonib turgan halqalar ustidan sakrash edi. Ijodiy guruh alangani tezda o‘chirishga muvaffaq bo‘ldi, ammo Akshay bir necha marta kuyish jarohatini olib ulgurgan edi. Akshay ham yordamchi kaskadyorlardan foydalanmaydi. Ammo oyog‘idan olgan jarohatiga qaramay, o‘zini tutib, navbatdagi dublga kirishib ketdi.
Mitxun Chakraborti
“Omad” filmining Janubiy Afrikada suratga olinayotgan sahnasida aktyor Mitxun Chakraborti samolyotda tryukni amalga oshirgan. U yerga qulaganida himoya gilamining ostiga yiqilgan va bir nechta toshlar tufayli jiddiy jarohat olgan. Mushaklardagi og‘riq juda qattiq bo‘lishiga qaramay, o‘sha vaqtda o‘zini yaxshi his qilgan. Lekin og‘riq bir necha oydan keyin yana qaytalangan. Shundan so‘ng uning uyiga har kuni shifokor kelib, muntazam ravishda davolash ishlarini olib borgan.
Izoh (0)