Qashqadaryoning G‘uzor tumanida Uzbekistan GTL zavodi qurilishidagi ishchilar 21-oktabr kuni norozilik namoyishi uyushtirgan, voqea aks etgan videoyozuvlar ijtimoiy tarmoqlarda tarqalgandi.
Ijtimoiy tarmoqlarda norozilik obyektda ish haqini to‘lash bilan bog‘liq muammolar tufayli yuzaga kelgani aytilgan. Energetika vazirligi matbuot xizmati esa tartibsizlik harakatlari ishchilar uchun mo‘ljallangan oshxonadagi monoblok tizimida (elektron kirish tizimi) texnik nosozlik yuz berib, ular kundalik ovqatlanishga kira olmagani sababli sodir bo‘lganini bildirgan.
Vazirlik matbuot xizmatining ma’lum qilishicha, ayni paytda qurilish maydonidagi vaziyat to‘liq barqarorlashgan bo‘lib, barcha masalalar ijobiy hal etildi.
Qurilish maydoniga Qashqadaryo viloyati hokimi, viloyat prokurori, milliy gvardiya va boshqa sektor rahbarlari, Enter Engineering kompaniyasi rahbari, Energetika vazirligi va “O‘zbekneftgaz” AJ vakillari yetib borgan.
Norozilik bildirgan ishchilar bilan ochiq muloqot tashkil etilib, ishchi-xodimlar tomonidan ko‘tarilgan barcha muammo va masalalar joyida hal etilgan va tegishliligi bo‘yicha qarorlar qabul qilingan.
“Ayni vaqtda vaziyat to‘liq barqarorlashgan bo‘lib, barcha masalalar ijobiy hal etildi va ishchi-xodimlar tez orada o‘z ish joylariga qaytmoqdalar”, — deyiladi Energetika vazirligi matbuot xizmati xabarida.
Izoh (0)