Xitoy va AQSh o‘rtasidagi savdo urushlari sabab 2019-yilda Huawei Amerikadagi barcha texnologik kompaniyalar va servislardan “uzib qo‘yilgan” edi. Endilikda kompaniya o‘z texnologiyalarini mustaqil rivojlantirmoqda, smartfonlari esa Google servisisiz AppGallery mobil ilovalar do‘konida ishlayapti, deb xabar beradi Hi-Tech.Mail.ru.
Yangi Huawei Mate 40 Pro flagmani sanksiyalar joriy etilganidan bir yil o‘tib taqdim etilgani sabab kompaniya uchun muhim ahamiyatga ega. WinFuture sayti smartfonning rasmiy suratlarini e’lon qilib, uning texnik tavsiflari bilan bo‘lishdi.
Mate 40 Pro dizayni ko‘p jihatdan oldin avlod flagmani, ya’ni Mate 30’ni takrorlaydi — kamera obyektivlari kichik aylana ichida joylashgan, korpus esa yengil gradientli xira yuzaga ega bo‘lgan. Smartfonga 2772x1344 pikselli 6,76 dyuymga ega OLED-displey o‘rnatilgan.
Smartfon yangi Kirin 9000 protsessorida ishlaydi — bu 5 nanometrli texnologik jarayon bazasida yaratilgan bozordagi ikkinchi protsessor. Birinchisi, iPhone 12’larga o‘rnatilgan A14 chipi hisoblanadi. Shuningdek, Mate 40 Pro 8 gigabayt tezkor va 256 gigabayt ichki xotiraga ega bo‘ladi. Akkumulyator sig‘imi esa 4400 mA/soat bo‘lib, 65 vattli tezkor quvvatlanish funksiyasini qo‘llab-quvvatlaydi.
Qurilma birdaniga uchta kameraga ega bo‘ladi — f/1,9 diafragmali 50 megapikselli asosiy, 20 megapikselli keng burchakli va 12 megapikselli telefoto. Shuningdek, 13 megapikselli oddiy frontal kamera hamda yuzni skaner qilishga mo‘ljallangan 3D-kamera ham o‘rnatiladi.
Huawei’ning yangi flagmani narxi bo‘yicha hozircha hech qanday ma’lumot yo‘q.
Izoh (0)