Хитой ва АҚШ ўртасидаги савдо урушлари сабаб 2019 йилда Huawei Америкадаги барча технологик компаниялар ва сервислардан «узиб қўйилган» эди. Эндиликда компания ўз технологияларини мустақил ривожлантирмоқда, смартфонлари эса Google сервисисиз AppGallery мобил иловалар дўконида ишлаяпти, деб хабар беради Hi-Tech.Mail.ru.
Янги Huawei Mate 40 Prо флагмани санкциялар жорий этилганидан бир йил ўтиб тақдим этилгани сабаб компания учун муҳим аҳамиятга эга. WinFuture сайти смартфоннинг расмий суратларини эълон қилиб, унинг техник тавсифлари билан бўлишди.
Mate 40 Prо дизайни кўп жиҳатдан олдин авлод флагмани, яъни Mate 30’ни такрорлайди — камера объективлари кичик айлана ичида жойлашган, корпус эса енгил градиэнтли хира юзага эга бўлган. Смартфонга 2772х1344 пикселли 6,76 дюймга эга OLED дисплей ўрнатилган.
Смартфон янги Kirin 9000 процессорида ишлайди — бу 5 нанометрли технологик жараён базасида яратилган бозордаги иккинчи процессор. Биринчиси, iPhone 12’ларга ўрнатилган А14 чипи ҳисобланади. Шунингдек, Mate 40 Prо 8 гигабайт тезкор ва 256 гигабайт ички хотирага эга бўлади. Аккумулятор сиғими эса 4400 мА/соат бўлиб, 65 ваттли тезкор қувватланиш функциясини қўллаб-қувватлайди.
Қурилма бирданига учта камерага эга бўлади — ф/1,9 диафрагмали 50 мегапикселли асосий, 20 мегапикселли кенг бурчакли ва 12 мегапикселли телефото. Шунингдек, 13 мегапикселли оддий фронтал камера ҳамда юзни сканер қилишга мўлжалланган 3D камера ҳам ўрнатилади.
Huawei’нинг янги флагмани нархи бўйича ҳозирча ҳеч қандай маълумот йўқ.
Изоҳ (0)