AQSh prezidenti Donald Tramp 3-noyabr kuni bo‘lib o‘tadigan saylovlarda mag‘lub bo‘lgan taqdirda hokimiyatning tinch yo‘l bilan topshirilishini ta’minlaydi. Bu haqda u Florida shtati, Mayami shahrida bo‘lib o‘tgan saylovoldi uchrashuvda aytib o‘tdi, deb yozadi “RBK”.
Saylovchilar bilan uchrashuvda NBC telekanali boshlovchisi Trampdan mag‘lub bo‘lsa, u hokimiyatni tinch yo‘l bilan topshirishini kafolatlash-kafolatmasligi haqida so‘radi. “Ha, men hokimiyatning tinch yo‘l bilan topshirilishini ta’minlayman. Ammo saylovlar haqqoniy bo‘lishini xohlayman”, — deb javob berdi prezident. Shuningdek, u jamoasi bilan o‘z g‘alabasiga ishonayotganini qo‘shimcha qildi.
Sentabr oxirida Oq uyda bo‘lib o‘tgan matbuot anjumanida Tramp bo‘lg‘usi prezident saylovlarida mag‘lub bo‘lgan taqdirda demokrat Jo Baydenga hokimiyat tinch yo‘l bilan topshirilishini kafolatlay olmasligini aytgan edi. Bunga sabab qilib pochta orqali ovoz berishga ishonmasligini, u soxtalashtirilishi mumkinligini keltirgan edi.
Trampning fikricha, uning raqibi saylovlarda qalbakilashtirish yuz bergan holatdagina g‘olib chiqishi mumkin. 15-oktabrdagi so‘rovlar natijalariga ko‘ra, amaldagi prezidentni amerikalik saylovchilarning 42,3 foizi, Baydenni — 51,7 foizi qo‘llab-quvvatlaydi.
Avvalroq AQSh prezidenti Donald Tramp unda COVID-19’ga nisbatan immunitet paydo bo‘lgani sababli saylovchilarni o‘pib-o‘pib olishga va’da bergan edi.
Shuningdek, Oq uy tomonidan beriladigan yordam evaziga 200 dan ortiq kompaniya Donald Trampga bir necha million dollar to‘lagani ma’lum bo‘ldi.
Mavzuga doir: COVID-19’ga qarshi dori Trampning ruhiyatiga ta’sir qilishi mumkin
Izoh (0)