Kuni kecha iste’foga chiqqan Qirg‘iziston prezidenti So‘ronbay Jeenbekov xalq oldida ham, Xudo oldida ham vijdoni toza ekanligini aytdi. “RBK”ning xabar berishicha, bu haqda u Qirg‘iziston parlamentining navbatdan tashqari yig‘ilishida aytgan.
“Mamlakat uchun qiyin bo‘lgan paytda vaziyatni tiklash uchun hamma narsani qilishga harakat qildim. Men uchun har bir vatandoshning hayoti va sog‘lig‘i azizdir. Men ketishga qaror qildim. Jamiyat bu qarorni turlicha qabul qildi, to‘g‘rimi yoki yo‘qmi, buni vaqt va tarix ko‘rsatadi. Xudo va xalq oldida vijdonim toza”, — degan Jeenbekov.
Shuningdek, u yig‘ilganlar oldida mamlakatni qonuniy yo‘lga qaytarish va vaziyatni barqarorlashtirish uchun barcha sa’y-harakatlarini ishga solganini ta’kidladi.
Yig‘ilish chog‘ida parlament Jeenbekovga prezidentlik faoliyati uchun minnatdorchilik bildirdi. Qonunchilik organi spikeri Kanat Isayev, xususan, uning mamlakat taraqqiyotiga ulkan hissa qo‘shganligini bildirdi. “Vatan oldidagi xizmatingiz g‘oyat kattadir. Sizning mardonavorligingiz tufayli barqarorlik saqlanib qolishga erishildi. So‘ronbay Jeenbekov sobiq prezidentning barcha imtiyozlarini saqlab qolishi kerak”, — deb ta’kidlagan u.
Qirg‘iziston prezidentligi lavozimidan iste’foga chiqishini ma’lum qilgach, Kanat Isayev avtomatik ravishda Qirg‘iziston prezidenti vazifasini bajaruvchi lavozimini egallagan, biroq yarim kun o‘tib iste’foga chiqqandi. Davlat rahbari vazifasini vaqtinchalik bajarish amaldagi bosh vazir Sadir Japarov zimmasiga o‘tdi.
Sadir Japarov yig‘ilishda hokimiyatni topshirish tinch yo‘l bilan o‘tganligini ta’kidladi. “Baxtimizga, hech qanday talovchilik yoki xususiy mulkni tortib olish bo‘lmadi. Inqilob ham bo‘lmagan. Hukumat tinch, qonuniy yo‘l bilan almashdi”, — degan u.
Jeenbekov o‘zining iste’foga chiqish bayonotida Qirg‘iziston tarixida o‘z xalqiga o‘q otgan va qon to‘kkan prezident sifatida qolishni istamasligini, mamlakat butunligi va jamiyatdagi totuvlik uning uchun hamma narsadan ustun ekanligini aytgandi.
Qirg‘izistonda 2005—2007-yillarda bosh vazir sifatida hukumatni boshqargan sobiq siyosatchi Feliks Kulov mamlakat prezidenti So‘ronbay Jeenbekovning iste’fo bergani yuzasidan o‘z fikr-mulohazalarini bildirib, noma’lum kuchlar zo‘ravonlik yo‘li bilan hukumatni egallashga urinib, prezidentga o‘z xohishi bilan iste’fo berish yoki o‘zaro urush boshlashni taklif etganini, aks holda bunday inqirozli davrda u o‘z xohishi bilan bunday yuqori lavozimni tark etish borasida qaror qabul qilmasligini ta’kidlagan.
“Endi parlamentni tarqatib yuborish haqida gap-so‘zlar urchigan. Keyin hukumat bosh vazirning boshqaruviga o‘tadi. Undan keyin nimalar bo‘lishi mumkinligini va hammasi qanday ssenariy ostida ketishi endi oydinlashmoqda”, – deb yozgan Kulov Facebook’dagi sahifasida.
Izoh (0)