Трамп сайловларда мағлуб бўлса, ҳокимият тинч йўл билан топширилишига ваъда берди

АҚШ президенти Дональд Трамп 3 ноябрь куни бўлиб ўтадиган сайловларда мағлуб бўлган тақдирда ҳокимиятнинг тинч йўл билан топширилишини таъминлайди. Бу ҳақда у Флорида штати, Майами шаҳрида бўлиб ўтган сайловолди учрашувда айтиб ўтди, деб ёзади «РБК».

Сайловчилар билан учрашувда NBC телеканали бошловчиси Трампдан мағлуб бўлса, у ҳокимиятни тинч йўл билан топширишини кафолатлаш-кафолатмаслиги ҳақида сўради. «Ҳа, мен ҳокимиятнинг тинч йўл билан топширилишини таъминлайман. Аммо сайловлар ҳаққоний бўлишини хоҳлайман», — деб жавоб берди президент. Шунингдек, у жамоаси билан ўз ғалабасига ишонаётганини қўшимча қилди.

Сентябрь охирида Оқ уйда бўлиб ўтган матбуот анжуманида Трамп бўлғуси президент сайловларида мағлуб бўлган тақдирда демократ Жо Байденга ҳокимият тинч йўл билан топширилишини кафолатлай олмаслигини айтган эди. Бунга сабаб қилиб почта орқали овоз беришга ишонмаслигини, у сохталаштирилиши мумкинлигини келтирган эди.

Трампнинг фикрича, унинг рақиби сайловларда қалбакилаштириш юз берган ҳолатдагина ғолиб чиқиши мумкин. 15 октябрдаги сўровлар натижаларига кўра, амалдаги президентни америкалик сайловчиларнинг 42,3 фоизи, Байденни — 51,7 фоизи қўллаб-қувватлайди.

Аввалроқ АҚШ президенти Дональд Трамп унда COVID-19’га нисбатан иммунитет пайдо бўлгани сабабли сайловчиларни ўпиб-ўпиб олишга ваъда берган эди.

Шунингдек, Оқ уй томонидан бериладиган ёрдам эвазига 200 дан ортиқ компания Дональд Трампга бир неча миллион доллар тўлагани маълум бўлди.