Niderlandiyada koronavirusga qayta chalingan odam vafot etdi, bu dunyodagi birinchi shunday holatdir

Niderlandiyada koronavirusni qayta yuqtirib olgan ayol vafot etdi, deb yozadi “RBK”. BNO News agentligi ma’lumotlariga ko‘ra, bu COVID-19 bilan qayta kasallanish oqibatida yuzaga kelgan dunyodagi birinchi o‘limdir.

Bemor 89 yoshli ayol limfomaning kam uchraydigan turi — Valdenstrem makroglubulinemiyasidan ham azob chekkan.

Keksa ayol kasalxonaga shu yil avvalroq baland harorat va qattiq yo‘tal bilan yotqizilgan. U koronavirusga topshirgan test ijobiy bo‘lib chiqqan. Ayol kasalxonada besh kun yotgan, shundan so‘ng holsizlikdan tashqari barcha simptomlar yo‘qolgan.

Qariyb ikki oydan keyin niderlandiyalik ayolda yana harorat ko‘tarilgan, u yo‘tal va nafas qisishidan shikoyat qilgan. Sog‘lig‘i yomonlashishidan ikki kun oldin ayol yangi kimyo terapiyasi kursini boshlagan. U yana kasalxonaga yotqizilgan.

Bemorning COVID-19’ga topshirgan testi yana ijobiy chiqqan. Sakkizinchi kunga kelib, ayolning ahvoli yomonlashgan, ikki haftadan so‘ng u vafot etgan.

Olimlar ikkala testni solishtirib, virusning genetik tarkibi farqlanishini aniqladi, bu esa ayol koronavirus infeksiyasini qayta yuqtirib olganini bildiradi.

Avvalroq rossiyalik virusolog Aleksandr Chepurnov koronavirusga qarshi immunitet olti oy saqlanib qolishini aytgan edi. Uning so‘zlariga ko‘ra, antitanalar soni uch-to‘rt oy davomida to‘liq yo‘qolgunga qadar kamayadi va beshinchi yoki oltinchi oyga kelib hujayraviy immunitet koronavirus antigeniga javob berishni to‘xtatadi.

Birinchi marotaba koronavirus bilan qayta kasallanish holati 24-avgustda ma’lum bo‘lgandi. Gonkong universiteti tadqiqotchilari 33 yoshli erkak birinchi kasallanishdan deyarli besh oy o‘tgach yana koronavirusga chalingan. Keyinchalik amerikalik shifokorlar ham koronavirus bilan qayta kasallanish holati haqida xabar berdi. U AQShning Nevada shtati, Rino shahrida yashovchi 25 yoshli shaxs bo‘lib, mamlakatda koronavirusga qayta chalingan birinchi bemor bo‘ldi.

18-aprelda ismi oshkor etilmagan ushbu fuqaroda birinchi marta koronavirus qayd etilgan. 27-aprelga kelib unda virus simptomlari yo‘qolgan. Koronavirusni aniqlash uchun ikki marta — 9 va 25-may kunlari o‘tkazilgan test natijalari unda virus yo‘qligini ko‘rsatgan. Lekin 28-may kuni u yana COVID-19’ga chalingan va bu safar kasallik og‘irroq kechgan. Virus genomini sekvenirlash ikkinchi kasallanish birinchisidan farq qilishini ko‘rsatgan.