COVID-19 kasalligini keltirib chiqaradigan SARS-Cov-2 koronavirusi qog‘oz va polimer banknotalar, shisha va zanglamaydigan po‘lat kabilar sirtida laboratoriya sharoitida 28 kun davomida saqlanib qolgani aniqlandi. Meduza’ning BBC News’ga tayanib yozishicha, bu haqda Avstraliyaning Ilmiy va amaliy tadqiqotlar davlat assotsiatsiyasi (CSIRO) tomonidan o‘tkazilgan tadqiqotida aytilgan.
Qayd etilishicha, avstraliyalik olimlar yuqish xavfini baholash uchun virus turli sirtlarda qancha saqlanib qolishi mumkinligini aniqlashga qaror qilgan. Avvalgi tadqiqotlardan biri virus banknotalarda va shishada ikki-uch kun, zanglamaydigan po‘lat va plastikda esa olti kungacha saqlanib qolishi mumkinligini ko‘rsatgandi. Shu bilan birga, CSIRO mutaxassislari virus zanglamaydigan po‘latda 3 kundan 14 kungacha saqlanib qolishi mumkinligi to‘g‘risida qarama-qarshi hisobotlar mavjudligini ta’kidlagan.
Yangi tajriba mualliflari koronavirus uchun qulay sharoitlar yaratdi: tadqiqot qorong‘i xonada o‘tkazildi. Chunki ultrabinafsha nurlar 20 daraja sovuq haroratda va bir xil namlikda virusga ta’sir ko‘rsatadi. Tabiiy sharoitda virusning omon qolish darajasi boshqacha bo‘lishi mumkin.
Tadqiqotga ko‘ra, 40 daraja haroratda virus paxtadan yasalgan matoda 24 soatdan kamroq, qolgan sirtlarda esa 48 soat saqlanib qolgan.
BBC News’ning yozishicha, Kardiff Universitetining Shamollashni o‘rganish markazining sobiq rahbari Ron Ekklz “jamiyatda keraksiz qo‘rquv” paydo qilishi sababli yangi tadqiqotni tanqid qildi. Uning ta’kidlashicha, virus biror yuzaga odam aksirganda, yo‘talganda yoki iflos qo‘llar bilan tegganda tushadi, ammo bu tadqiqotda odam so‘lagidan virus tarqalishi vositasi sifatida ishlatilmagan.
Izoh (0)