Нидерландияда коронавирусга қайта чалинган одам вафот этди, бу дунёдаги биринчи шундай ҳолатдир

Нидерландияда коронавирусни қайта юқтириб олган аёл вафот этди, деб ёзади «РБК». BNO News агентлиги маълумотларига кўра, бу COVID-19 билан қайта касалланиш оқибатида юзага келган дунёдаги биринчи ўлимдир.

Бемор 89 ёшли аёл лимфоманинг кам учрайдиган тури — Вальденстрем макроглубулинемиясидан ҳам азоб чеккан.

Кекса аёл касалхонага шу йил аввалроқ баланд ҳарорат ва қаттиқ йўтал билан ётқизилган. У коронавирусга топширган тест ижобий бўлиб чиққан. Аёл касалхонада беш кун ётган, шундан сўнг ҳолсизликдан ташқари барча симптомлар йўқолган.

Қарийб икки ойдан кейин нидерландиялик аёлда яна ҳарорат кўтарилган, у йўтал ва нафас қисишидан шикоят қилган. Соғлиғи ёмонлашишидан икки кун олдин аёл янги кимё терапияси курсини бошлаган. У яна касалхонага ётқизилган.

Беморнинг COVID-19’га топширган тести яна ижобий чиққан. Саккизинчи кунга келиб, аёлнинг аҳволи ёмонлашган, икки ҳафтадан сўнг у вафот этган.

Олимлар иккала тестни солиштириб, вируснинг генетик таркиби фарқланишини аниқлади, бу эса аёл коронавирус инфекциясини қайта юқтириб олганини билдиради.

Аввалроқ россиялик вирусолог Александр Чепурнов коронавирусга қарши иммунитет олти ой сақланиб қолишини айтган эди. Унинг сўзларига кўра, антитаналар сони уч-тўрт ой давомида тўлиқ йўқолгунга қадар камаяди ва бешинчи ёки олтинчи ойга келиб ҳужайравий иммунитет коронавирус антигенига жавоб беришни тўхтатади.

Биринчи маротаба коронавирус билан қайта касалланиш ҳолати 24 августда маълум бўлганди. Гонконг университети тадқиқотчилари 33 ёшли эркак биринчи касалланишдан деярли беш ой ўтгач яна коронавирусга чалинган. Кейинчалик америкалик шифокорлар ҳам коронавирус билан қайта касалланиш ҳолати ҳақида хабар берди. У АҚШнинг Невада штати, Рино шаҳрида яшовчи 25 ёшли шахс бўлиб, мамлакатда коронавирусга қайта чалинган биринчи бемор бўлди.

18 апрелда исми ошкор этилмаган ушбу фуқарода биринчи марта коронавирус қайд этилган. 27 апрелга келиб унда вирус симптомлари йўқолган. Коронавирусни аниқлаш учун икки марта — 9 ва 25 май кунлари ўтказилган тест натижалари унда вирус йўқлигини кўрсатган. Лекин 28 май куни у яна COVID-19’га чалинган ва бу сафар касаллик оғирроқ кечган. Вирус геномини секвенирлаш иккинчи касалланиш биринчисидан фарқ қилишини кўрсатган.