Armaniston va Ozarbayjon Mudofaa vazirliklari bir-birini Tog‘li Qorabog‘da o‘t ochishni to‘xtatish rejimini buzishda ayblagan edi. Shundan so‘ng Ozarbayjon bosh prokuraturasi Ganja shahridagi otishmada raketa turar joy binosiga borib tushishi natijasida 5 nafar tinch aholi vakili halok bo‘lgani, 28 nafar odam jarohatlanganini ma’lum qilgan. Hodisa joyidagi qidiruv-qutqaruv ishlari davom etmoqda. Mamlakatning ikkinchi yirik shahri sanalgan Ganja hududi Armaniston hududidan turib o‘qqa tutilgani haqida Ozarbayjon Mudofaa vazirligi xabar bergan edi. Biroq rasmiy Yerevan buni yolg‘on ma’lumot, deb atagan.
Mavzuga doir: Snaryad yotgan balkon, o‘lgan qo‘ylar, tomi teshilgan cherkov: Tog‘li Qorabog‘dagi otishma oqibatlari — suratlarda
Tog‘li Qorabog‘dagi mojaro avj ola boshlaganidan beri Ozarbayjon va Armaniston bir-birlarini aholi punktlarini o‘qqa tutishda ayblamoqda. Shu bilan birga, ikkala tomon ham bunga aloqadorligini inkor etmoqda. Eslatib o‘tamiz, Tog‘li Qorabog‘da keng qamrovli jangovar harakatlar 27-sentabrdan buyon davom etmoqda. Ozarbayjon va Armaniston 10-oktabr kuni soat 12:00 dan boshlab Tog‘li Qorabog‘da o‘t ochishni to‘xtatish to‘g‘risida kelishib olgandi.
Reuters nashri Ganja shahridagi hodisa oqibatlari aks etgan fotojamlanmani taqdim etdi.
Izoh (0)