Qirg‘izistonning sobiq prezidenti Almazbek Atambayevga nisbatan suiqasd uyushtirildi. Bu haqda uning maslahatchisi Qunduz Joldubayev Sputnik nashriga ma’lum qildi, deb yozmoqda “RBK”.
Sobiq prezidentning maslahatchisi Facebook’da Atambayev o‘z avtomobilidagi o‘q izlarini ko‘rsatayotgani aks etgan videoni e’lon qilgan. Joldubayevaning so‘zlariga ko‘ra, mashinaga jangovar o‘qlar otilgan, sobiq prezident jarohat olmagan.
“Rezina o‘q zirhni, Mercedes’ni teshib o‘ta oladimi?”, — deya ta’kidlagan Atambayev. Sobiq davlat rahbari bu holat sizni yo‘q qilish uchun uyushtirilgan deb hisoblaysizmi, degan savolga “Sen nima deb o‘ylaysan, jangovar patronlar bilan mening mashinamga nima uchun otishadi?”, — deya javob qaytargan.
Qayd etilishicha, noma’lum shaxslar Bishkekdagi tartibsizliklar vaqtida Atambayevning mashinasini o‘qqa tutishga uringan.
9-oktabr kuni Bishkekning markaziy maydonida Almazbek Atambayev va sobiq bosh vazir Omurbek Babanovni qo‘llab-quvvatlash uchun namoyish bo‘lib o‘tgan. Atambayev namoyishchilar oldida chiqish qilgan. Keyin esa yig‘ilganlar tomonga sobiq deputat Sadir Japarovning tarafdorlaridan iborat guruh harakatlangan. Namoyishchilar o‘rtasida mushtlashuv boshlangan, ular bir-biriga tosh va butilkalar otgan, o‘q ovozlari eshitilgan. Yakunda Atambayev va Babanov maydonni tark etgan.
Avvalroq Qirg‘iziston poytaxti Bishkek shahriga harbiy bo‘linmalar va harbiy texnika kiritilayotgani, shaharda favqulodda holat rejimi joriy qilingani haqida xabar berilgandi.
Izoh (0)