Qashqadaryo viloyatida haftaning har seshanba kuni “maktablar kuni” deb e’lon qilindi. Bu haqda viloyat hokimi Zoir Mirzayev pandemiya sharoitida umumta’lim maktablarida o‘quv jarayonini tashkil etish va yuzaga kelayotgan muammolarni bartaraf etish masalalariga bag‘ishlangan yig‘ilishda ma’lum qildi, deya xabar berdi “Daryo” muxbiri.
Ma’lumot berilishicha, viloyat hokimi shahar va tuman hokimlariga murojaat qilib, ularni haftaning har seshanbasida hududlardagi maktablarda bo‘lib, ta’lim tizimi xodimlari bilan muloqot qilishga chaqirgan.
“Hokimlar haftaning har seshanbasida maktablarda bo‘lib, dars o‘tsin. O‘qituvchilar bilan muloqot qilib, ularning muammolari bilan qiziqsin. Hokim sifatida kamchiliklarga yechim topsin”, — dedi viloyat rahbari.
Viloyat hokimi Zoir Mirzayev viloyatdagi maktab direktorlarining “ishlayman”, “yangilik qilaman” deya tashabbus ko‘rsatganlarini tanlab olib, Buxoro viloyatining Qorako‘l tumanidagi matematikaga ixtisoslashgan maktabga olib borib, tajriba orttirishi uchun imkoniyat yaratish berish taklifini o‘rtaga tashladi.
“Maktab direktorlari Qorako‘ldagi maktabga borib, tajriba orttirsin, yangilik qilsin. Har bir tuman va shaharda matematika, kimyo-biologiya fanlariga ixtisoslashgan maktablar tashkil qilaylik. Ta’limda yangilik qiladigan vaqt keldi”, — dedi hokim.
Zoir Mirzayev viloyatda matematika va kimyo-bilogiya fanlariga ixtisoslashgan maktab tashkil qilib, yaxshi natija ko‘rsatgan maktab direktorlariga oylik-maoshidan tashqari viloyat hokimligi tomonidan har oy 5 million so‘mdan mukofot berilishini ma’lum qildi.
“Qaysi maktab direktori maktabini matematika yoki kimyo-biologiyaga ixtisoslashtirib, yaxshi natijalar ko‘rsatsa, har oy oylik maoshidan tashqari viloyat hokimligi tomonidan 5 million so‘mdan mukofot ham berib boriladi”, — deydi Zoir Mirzayev.
Qashqadaryo hokimi yig‘ilish davomida maktablarda faoliyat yurituvchi qorovullar ko‘pincha nafaqaga chiqqan fuqarolar ekanligini aytib, “Faqat nafaqaga chiqqan odam maktab qorovuli bo‘lishi kerak degan tushunchani o‘zgartirib, ishsiz yoshlarni ham qorovullikka olish kerak”, — dedi.
“Maktab qorovuli maktabga kelgach, uxlamasdan hududini qo‘riqlab chiqishi kerak-ku. Xo‘sh, nafaqa yoshidagi qorovul buni qay darajada uddalaydi?”, — deya savol berdi hokim.
Eslatib o‘tamiz, Prezident Shavkat Mirziyoyev o‘qituvchi va murabbiylar bayramiga bag‘ishlangan tabrigida “Qorako‘l maktabi biz uchun zamonaviy maktabning haqiqiy andozasi emasmi? Nima uchun Xalq ta’limi vazirligi uning noyob tajribasini yetarlicha ommalashtirmayapti? Nima uchun boshqa maktab direktorlari bu ta’lim dargohidan ibrat olmayapti? Xalq ta’limi vaziri Sh.Shermatov nega uch yildan buyon bu jiddiy masalaga yetarlicha e’tibor bermayapti?”, degandi.
Izoh (0)