Қашқадарё вилоятида ҳафтанинг ҳар сешанба куни «мактаблар куни» деб эълон қилинди. Бу ҳақда вилоят ҳокими Зоир Мирзаев пандемия шароитида умумтаълим мактабларида ўқув жараёнини ташкил этиш ва юзага келаётган муаммоларни бартараф этиш масалаларига бағишланган йиғилишда маълум қилди, дея хабар берди «Дарё» мухбири.
Маълумот берилишича, вилоят ҳокими шаҳар ва туман ҳокимларига мурожаат қилиб, уларни ҳафтанинг ҳар сешанбасида ҳудудлардаги мактабларда бўлиб, таълим тизими ходимлари билан мулоқот қилишга чақирган.
«Ҳокимлар ҳафтанинг ҳар сешанбасида мактабларда бўлиб, дарс ўцин. Ўқитувчилар билан мулоқот қилиб, уларнинг муаммолари билан қизиқсин. Ҳоким сифатида камчиликларга ечим топсин», — деди вилоят раҳбари.
Вилоят ҳокими Зоир Мирзаев вилоятдаги мактаб директорларининг «ишлайман», «янгилик қиламан» дея ташаббус кўрсатганларини танлаб олиб, Бухоро вилоятининг Қоракўл туманидаги математикага ихтисослашган мактабга олиб бориб, тажриба орттириши учун имконият яратиш бериш таклифини ўртага ташлади.
«Мактаб директорлари Қоракўлдаги мактабга бориб, тажриба орттирсин, янгилик қилсин. Ҳар бир туман ва шаҳарда математика, кимё-биология фанларига ихтисослашган мактаблар ташкил қилайлик. Таълимда янгилик қиладиган вақт келди», — деди ҳоким.
Зоир Мирзаев вилоятда математика ва кимё-билогия фанларига ихтисослашган мактаб ташкил қилиб, яхши натижа кўрсатган мактаб директорларига ойлик-маошидан ташқари вилоят ҳокимлиги томонидан ҳар ой 5 миллион сўмдан мукофот берилишини маълум қилди.
«Қайси мактаб директори мактабини математика ёки кимё-биологияга ихтисослаштириб, яхши натижалар кўрсаца, ҳар ой ойлик маошидан ташқари вилоят ҳокимлиги томонидан 5 миллион сўмдан мукофот ҳам бериб борилади», — дейди Зоир Мирзаев.
Қашқадарё ҳокими йиғилиш давомида мактабларда фаолият юритувчи қоровуллар кўпинча нафақага чиққан фуқаролар эканлигини айтиб, «Фақат нафақага чиққан одам мактаб қоровули бўлиши керак деган тушунчани ўзгартириб, ишсиз ёшларни ҳам қоровулликка олиш керак», — деди.
«Мактаб қоровули мактабга келгач, ухламасдан ҳудудини қўриқлаб чиқиши керак-ку. Хўш, нафақа ёшидаги қоровул буни қай даражада уддалайди?», — дея савол берди ҳоким.
Эслатиб ўтамиз, Президент Шавкат Мирзиёев ўқитувчи ва мураббийлар байрамига бағишланган табригида «Қоракўл мактаби биз учун замонавий мактабнинг ҳақиқий андозаси эмасми? Нима учун Халқ таълими вазирлиги унинг ноёб тажрибасини етарлича оммалаштирмаяпти? Нима учун бошқа мактаб директорлари бу таълим даргоҳидан ибрат олмаяпти? Халқ таълими вазири Ш.Шерматов нега уч йилдан буён бу жиддий масалага етарлича эътибор бермаяпти?», деганди.
Изоҳ (0)