Jinoyat ishlari bo‘yicha Samarqand shahar sudida xorijga ishga jo‘natish bahonasida fuqarolarni chuv tushirgan “Amilee Bahora” xususiy bandlik agentligi MChJ rahbarlariga sud hukmi o‘qildi. Bu haqda Oliy sud matbuot xizmatiga tayanib, “Kun.uz” xabar berdi.
Oliy sud matbuot xizmatining ma’lum qilishicha, sudlanuvchilar — “Amilee Bahora” xususiy bandlik agentligi MChJ ta’sischisi va huquqshunosi, 1970-yilda tug‘ilgan Jahongir Tohirov va agentlik ta’sischisi hamda rahbari, 1972-yilda tug‘ilgan Bahora Raupovaga nisbatan sud hukmi o‘qilgan.
Ushbu jinoyat ishi bo‘yicha yakuniy sud majlisi 2020-yil 5-oktabr kuni jinoyat ishlari bo‘yicha Samarqand shahar sudi binosida ochiq sud majlisida, raislik qiluvchi sudya Z.Ahmedova, sudya yordamchisi Z.Fayziyev va X.Rabbimov kotibligida bo‘lib o‘tgan.
Mazkur jinoyat ishida jabrlanuvchilar soni 300 nafardan oshiqroqni tashkil etgan.
Sud hukmiga ko‘ra, sudlanuvchi Jahongir Tohirov Jinoyat kodeksining 168-moddasi 3-qismi “b” bandi (takroran yoki xavfli retsidivist tomonidan sodir etilgan firibgarlik), 189-moddasi 1-qismi (tovarlar savdosi yoki xizmat ko‘rsatish qoidalarini juda ko‘p miqdordagi qiymatda buzish) va 228-moddasi 1-qismida (hujjatlar, shtamplar, muhrlar, blankalar tayyorlash, ularni qalbakilashtirish, sotish yoki ulardan foydalanish) nazarda tutilgan jinoyatni sodir qilganlikda aybli deb topildi va unga Jinoyat kodeksining 57-moddasini qo‘llab, 7 yil muddatga ozodlikdan mahrum qilish jazosi tayinlandi. Jazoni umumiy tartibli koloniyada o‘tash belgilandi.
Sudlanuvchi Bahora Raupova Jinoyat kodeksining 168-moddasi 3-qismi “b”, “v” bandlari (takroran yoki xavfli retsidivist tomonidan xizmat mavqeyidan foydalanib sodir etilgan firibgarlik) va 189-moddasi 1-qismida (tovarlar savdosi yoki xizmat ko‘rsatish qoidalarini juda ko‘p miqdordagi qiymatda buzish) nazarda tutilgan jinoyatni sodir qilganlikda aybli deb topildi va Jinoyat kodeksining 57-moddasini qo‘llab, 5 yil muddatga ozodlikdan mahrum qilish jazosi tayinlandi. Jazoni umumiy tartibli koloniyada o‘tash belgilandi.
Bundan tashqari, sud hukmiga ko‘ra, sudlanuvchilarga tegishli bo‘lgan Samarqand shahar Registon ko‘chasidagi 9-uyning 1-qavatida joylashgan va 1,317 milliard so‘mga baholangan 116,95 kvadrat metr ofis binosi kimoshdi savdosi orqali sotuvga qo‘yilib, sudlanuvchilarga aldangan fuqarolarga taqsimlab berilishi va ortib qolgan mablag‘ Jahongir Tohirov va Bahora Raupovaga qaytarib berilishi belgilandi.
“Kun.uz”ning yozishicha, mazkur agentlik faoliyati ortidan kelib chiqqan noroziliklar bo‘yicha 2019-yil dekabr oyida, 2020-yil yanvar oyida mamlakatning turli hududlaridan bo‘lgan ko‘plab fuqarolar murojaat qilgan. Ana o‘sha murojaatlarda ko‘plab fuqarolar “Amilee Bahora” xususiy bandlik agentligi MChJ faoliyatidan norozi bo‘lgan.
Keyinchalik ko‘plab fuqarolarning huquqni himoya qilish organlariga qilgan murojaatlari ortidan mazkur agentlikning litsenziyasi 2020-yil 4-mart kunidan boshlab Bandlik va mehnat munosabatlari vazirligi tomonidan to‘xtatib qo‘yilgan.
Avvalroq Samarqandda fuqarolarni chet elga yuborishni va’da qilib, qariyb 787 million so‘m pulni o‘zlashtirgan Consort xususiy bandlik agentligi mansabdorlariga jinoyat ishi qo‘zg‘atilgani haqida xabar berilgandi.