Chilonzorda 13 yoshli bolaga kuch ishlatgan IIB xodimlari jazolandi

Ijtimoiy tarmoqlarda Toshkent shahrining Chilonzor tumanida profilaktika inspektori tunda 13 yoshli bolaning qo‘llarini qayirib, o‘zining Matiz rusumli mashinasida noma’lum tomonga olib ketgani aks etgan video joylashtirilgandi, deya xabar bermoqda Repost.

Ma’lum qilinishicha, Chilonzor tumanidagi dahalarning birida tungi vaqtda bola vahimaga tushib, baland ovoz bilan odamlarni yordamga chaqirgani eshitilgan. Yaqin atrofda yashovchilar bolaning qichqirig‘ini eshitib, ko‘chaga chiqib kelgan. Uni qo‘lga olgan inspektorning aytishicha, bola tunda boshqa birovning uyiga kirgan.

Yig‘ilgan fuqarolardan biri bolaning onasini chaqirganida inspektor bolani mashinasida noma’lum tomonga olib ketgan. Mashina ortidan aholi vakillaridan biri kuzatib borgan va butun holatni tasvirga tushirgan.

https://youtu.be/U9hWnvQI2_g

Bola qo‘yib yuborilgach, inspektor uning yuziga oyog‘i bilan tepib, urganini aytgan. Bolaning so‘zlariga ko‘ra, u chiqindixonaning yonidan o‘tib ketayotganida inspektor uni so‘roq qila boshlagan. So‘ng bola qo‘rqib ketib, boshqa uyning ayvoniga chiqib olgan. IIB xodimi uni ushlab, mashinasi oldiga olib kelgan.

IIBB matbuot kotibi Irina Sayfutdinova vaziyat poytaxt IIBB boshlig‘ining shaxsiy nazorati ostida ekanini va profilaktika inspektorining xatti-harakatlari prinsipial jihatdan baholanishini ma’lum qilgan.

Shahar IIBBning 7-oktabrda bergan xabariga ko‘ra, ichki ishlar xodimining voyaga yetmagan bolaga nisbatan nojo‘ya munosabati videoyozuvi fakti bo‘yicha Toshkent shahar IIBB boshlig‘i topshirig‘i bo‘yicha belgilangan xizmat tekshiruvi yakunlangan.

Ma’lum qilinishicha, xizmat tekshiruvi yakuniga ko‘ra Chilonzor tumani IIO FMBning yetti nafar xodimlariga nisbatan intizomiy jazo choralari qo‘llanilgan. IIO FMB boshlig‘ining huquqbuzarliklar profilaktikasi va tarbiyaviy ishlar bo‘yicha ikki nafar o‘rinbosari hamda IIO FMB va 2-son IIB profilaktika xizmati rahbar xodimi — jami uch nafar xodim qat’iy ogohlantirilgan. 19-sentabdan 20-sentabrga o‘tar kechasida navbatchilik qilgan navbatchilik qismining katta inspektorining xatti-harakatlari intizomiy kengashda ko‘rib chiqilgan.

Shuningdek, Chilonzor tumani IIO FMB 2-son ichki ishlar bo‘limi profilaktika inspektori katta leytenant Diyor Boltayevga hayfsan e’lon qilingan.

Qayd etilishicha, 13 yoshli bolaning oilasidagi holatni, xususan, o‘smirning jiddiy kasalligini, onasi yolg‘iz tarbiya qilayotganini inobatga olgan holda Chilonzor tumani IIO FMB xodimlari tomonidan xonadondagi santexnika jihozlarini ta’mirlashda amaliy yordam ko‘rsatilgan.