Чилонзорда 13 ёшли болага куч ишлатган ИИБ ходимлари жазоланди

Ижтимоий тармоқларда Тошкент шаҳрининг Чилонзор туманида профилактика инспектори тунда 13 ёшли боланинг қўлларини қайириб, ўзининг Matiz русумли машинасида номаълум томонга олиб кетгани акс этган видео жойлаштирилганди, дея хабар бермоқда Repost.

Маълум қилинишича, Чилонзор туманидаги даҳаларнинг бирида тунги вақтда бола ваҳимага тушиб, баланд овоз билан одамларни ёрдамга чақиргани эшитилган. Яқин атрофда яшовчилар боланинг қичқириғини эшитиб, кўчага чиқиб келган. Уни қўлга олган инспекторнинг айтишича, бола тунда бошқа бировнинг уйига кирган.

Йиғилган фуқаролардан бири боланинг онасини чақирганида инспектор болани машинасида номаълум томонга олиб кетган. Машина ортидан аҳоли вакилларидан бири кузатиб борган ва бутун ҳолатни тасвирга туширган.

https://youtu.be/U9hWnvQI2_g

Бола қўйиб юборилгач, инспектор унинг юзига оёғи билан тепиб, урганини айтган. Боланинг сўзларига кўра, у чиқиндихонанинг ёнидан ўтиб кетаётганида инспектор уни сўроқ қила бошлаган. Сўнг бола қўрқиб кетиб, бошқа уйнинг айвонига чиқиб олган. ИИБ ходими уни ушлаб, машинаси олдига олиб келган.

ИИББ матбуот котиби Ирина Сайфутдинова вазият пойтахт ИИББ бошлиғининг шахсий назорати остида эканини ва профилактика инспекторининг хатти-ҳаракатлари принципиал жиҳатдан баҳоланишини маълум қилган.

Шаҳар ИИББнинг 7 октябрда берган хабарига кўра, ички ишлар ходимининг вояга етмаган болага нисбатан ножўя муносабати видеоёзуви факти бўйича Тошкент шаҳар ИИББ бошлиғи топшириғи бўйича белгиланган хизмат текшируви якунланган.

Маълум қилинишича, хизмат текшируви якунига кўра Чилонзор тумани ИИО ФМБнинг етти нафар ходимларига нисбатан интизомий жазо чоралари қўлланилган. ИИО ФМБ бошлиғининг ҳуқуқбузарликлар профилактикаси ва тарбиявий ишлар бўйича икки нафар ўринбосари ҳамда ИИО ФМБ ва 2-сон ИИБ профилактика хизмати раҳбар ходими — жами уч нафар ходим қатъий огоҳлантирилган. 19-сентабдан 20 сентябрга ўтар кечасида навбатчилик қилган навбатчилик қисмининг катта инспекторининг хатти-ҳаракатлари интизомий кенгашда кўриб чиқилган.

Шунингдек, Чилонзор тумани ИИО ФМБ 2-сон ички ишлар бўлими профилактика инспектори катта лейтенант Диёр Болтаевга ҳайфсан эълон қилинган.

Қайд этилишича, 13 ёшли боланинг оиласидаги ҳолатни, хусусан, ўсмирнинг жиддий касаллигини, онаси ёлғиз тарбия қилаётганини инобатга олган ҳолда Чилонзор тумани ИИО ФМБ ходимлари томонидан хонадондаги сантехника жиҳозларини таъмирлашда амалий ёрдам кўрсатилган.